کامیڈی شو تارک مہتا کا الٹا چشمہ حال ہی میں اس وقت خبروں میں آیا جب ایک ٹی وی اداکارہ نے پروڈیوسر اور پروڈکشن ہیڈ پر ذہنی اور جنسی طور پر ہراساں کرنے کا الزام لگایا۔ شو کے کچھ دیگر سابق اداکار نے بھی پروڈیوسر اسیت کمار مودی اور ان کی ٹیم کے ساتھ پریشانی کا سامنا کرنے کے بارے میں بات کی۔ یہاں تک کہ کچھ اداکاروں نے یہ بھی کہا کہ پروڈیوسر اداکاروں کو خصوصی معاہدوں پر دستخط کرنے پر مجبور کرتے تھے۔TMKOC Producer on sexual harassment allegation
مودی نے حال ہی میں ان الزامات کے بارے میں کھل کر بات کی اور کسی کے ساتھ زیادتی کرنے کی تردید کی۔ انہوں نے آئی اے این ایس کو بتایا کہ'جذباتی طور پر میں اداس محسوس کرتا ہوں۔ جیسا کہ میں سب کو اپنے خاندان کے افراد کی طرح سمجھتا ہوں۔ اور میں ایک بار پھر کہہ رہا ہوں کہ میں نے کبھی کسی کے ساتھ کوئی غلط کام نہیں کیا۔ میں نے سب کو خوش رکھنے کی کوشش کی ہے کیونکہ میں اپنے شو کے ذریعے ہر روز خوشیاں بانٹ رہا ہوں۔ اس لیے میں اپنی ٹیم کو بھی بہت خوش رکھنے اور انہیں اچھے اور مثبت ماحول میں رکھنے کی کوشش کرتا ہوں'۔
انہوں نے یہ بھی بتایا کہ کئی رکاوٹوں کا سامنا کرنے کے باوجود ان کا شو حال ہی میں 15 سال مکمل کرنے میں کامیاب ہوا۔ اسیت کہتے ہیں کہ 'ہر کامیاب کام میں رکاوٹیں آتی ہیں اور جو رکاوٹوں سے گزرتے ہیں وہی زندگی میں کامیاب ہوتے ہیں۔ لہذا ہم رکاوٹوں اور چیلنجوں کو قبول کر رہے ہیں اور جو کچھ بھی ہمارے اندر اور ارد گرد ہو رہا ہے، ہم اس کا مقابلہ مثبت ذہنیت کے ساتھ کر رہے ہیں'۔
انہوں نے مزید کہا کہ 'ہم نے کبھی کسی کے ساتھ کچھ غلط نہیں کیا۔ ہم نے ہمیشہ سب کو خوش رکھا ہے۔ اس لیے ہم پریشان نہیں ہوتے، ہم دل سے صاف اور پاکیزہ ہیں'۔
واضح رہے کہ شو کی سابق اداکارہ جینیفر مستر نے الزام لگایا کہ شو کے آپریشنز ہیڈ سہیل رمانی اور ان کے معاون نے ان کی توہین کی اور انہیں 7 مارچ کو سیٹ چھوڑنے کو کہا۔ اس کے بعد شو کے میکرز نے انہیں نوٹس بھیجا کہ سیٹ پر ان کی غیر موجودگی کی وجہ سے انہیں پیسے کا نقصان ہو رہا ہے۔ جس کے بعد انہوں نے اپنے وکیل سے رجوع کرنے کا فیصلہ کیا اور شو کے پروڈیوسر کو قانونی نوٹس بھیجا۔ ٹی وی اداکارہ نے یہ بھی کہا کہ انہوں نے پہلے اس بارے میں اس لیے بات نہیں کی کیونکہ انہیں نتائج کا خدشہ تھا۔
