جموں و کشمیر کے گرمائی دارالحکومت سرینگر کے رنگریٹ علاقے میں سکیورٹی فورسز اور عسکریت پسندوں کے درمیان تصادم آرائی اختتام پذیر ہوگئی ہے۔ جس کے نتیجے میں دو عسکریت پسند ہلاک Militants Killed in Encounter ہوئے ہیں۔
ایک سینیئر پولیس آفیسر نے ای ٹی وی بھارت کو بتایا کہ 'باوثوق ذرائع کی جانب سے اطلاع موصول ہوئی تھی کہ علاقے میں دو عسکریت پسند چھپے ہوئے ہیں۔ جس کے بعد سکیورٹی فورسز نے علاقے کو محاصرے میں لیا اور تلاشی مہم شروع کی گئی۔
اُن کا مزید کہنا تھا کہ 'جب سکیورٹی فورسز مشتبہ جگہ پہنچے تو چھپے ہوئے عسکریت پسندوں نے گولیاں چلائی۔ جس کی جوابی کارروائی کے دوران دو عسکریت پسند ہلاک کیے گئے۔ فی الحال اُن کی شناخت نہیں ہوسکی ہے۔
وہیں تصادم ختم ہونے کے بعد علاقے میں پتھراؤ اور نعرے بازی بھی ہوئی جس پر قابو پانے کے لیے پولیس کو آنسو گیس کے گولے کا استعمال کرنا پڑا۔
مقامی لوگوں نے تصادم پر اپنے خدشات ظاہر کرتے ہوئے کہا کہ 'اتنی جلدی تصادم آرائی ختم نہیں ہوتی۔ پولیس ان لڑکوں کو گرفتار بھی کرسکتی تھی، انہیں ہلاک کیوں کیا گیا؟
