ریاست اترپردیش کے شہر بنارس کے بنیا باغ علاقے میں واقع حضرت سید عبدالرحیم شاہ کے آستانے پر بھی حضرت خواجہ غریب نوازؒ کا عرس مسلسل تین روز منایا جائے گا۔
آج بھی عبدالرحیم شاہ کے آستانے سے خواجہ کی بارگاہ میں خراج عقیدت کا نذرانہ پیش کیا گیا اور عوام کو شیرینی لنگر کے طور پر تقسیم کی گئی۔
آستانہ پر عقیدت مندوں نے قرآن خوانی کا بھی اہتمام کر ایصال ثواب کیا۔ وہیں دن بھر عوام کا آنا جانا روضہ پر لگا رہا۔
آستانہ کے سجادہ نشین محمد شاہد نے بتایا کہ 'ہر برس حضرت خواجہ معین الدین چشتی کے عرس کے موقع پر آستانے پر عقیدت مندوں کا ہجوم ہوتا ہے جو لوگ اجمیر شریف نہیں جا پاتے ہیں، وہ بابا رحیم شاہ کے آستانے پر حضرت خواجہ غریب نواز رحمۃ اللہ علیہ کا عرس مناتے ہیں اور خراج عقیدت پیش کرتے ہیں۔'
انہوں نے بتایا کہ 'اس موقع پر ملک میں امن و شانتی کے لیے دعائیں بھی مانگی جاتی ہیں۔'
