ریاست مدھیہ پردیش کے ساگر ڈویزن کے چھترپور ضلع کے بکسواہا تھانہ علاقہ میں ہفتے کی صبح ایک ٹرک کے پلٹ جانے سے اس میں سوار چھ مزدوروں کی موت ہوگئی جبکہ دو درجن سے زیادہ زخمی ہوگئے۔
پولیس ذرائع کے مطابق مہاراشٹر کے پالدھر ضلع سے اترپردیش کی طرف جا رہا کپڑے سے لدا ٹرک چھترپور ضلع کے بکسواہا تھانہ علاقہ کے سیمرا پل کے نزدیک پلٹ گیا۔
حادثہ میں ٹرک میں سوار چھ مزدوروں میں سے پانچ کی موقعے پر ہی موت واقع ہو گئی جبکہ 17سالہ ایک لڑکی اسپتال میں علاج کے دوران فوت ہو گئیں جبکہ تقریباًً دو درجن لوگ زخمی ہوگئے، جنہیں ساگر ضلع کے بنڈا کے اسپتال میں داخل کرایا گیا۔
مرنے والوں میں سے ایک کی شناخت گڑیا کے طور پر پہلے ہی ہوگئی تھی جبکہ منصور علی، اسما علی، چنکی، لال وتی یادو اور رام شرن یادو کی کچھ دیر بعد شناخت ہوسکی۔ ان میں لال وتی اور رام شرن میاں بیوی ہیں۔
حادثے میں زخمی 16مزدوروں کو پہلے ساگر ضلع کے بنڈا لے جایا گیا، جہاں سے ساگر ضلع اسپتال ریفر کر دیا گیا۔ تمام مزدور اترپردیش کے سدھارتھ نگر اور کانپور کے رہنے والے ہیں، جو لاک ڈائون کے سبب مہاراشٹر کے پالدھر ضلع میں پھنسے ہوئے تھے اور اب اپنے گھر واپس جا رہے تھے۔
