تعلیمی انقلاب اور تحفظ اُردو کے لیے امارت شرعیہ بہار اڈیسہ اور جھارکھنڈ نے ہفتہ برائے ترغیب تعلیم اور تحفظ اُردو کے تحت ریاست گیر تحریک کا آغاز کیا ہے۔ اس کے تحت ہر روز 7 اضلاع میں 7 پروگرام کیے جا رہے ہیں۔
امارت شرعیہ نے حکومت سے مطالبہ کیا ہے کہ تمام تر محکموں کے نام اردو میں بھی لکھے جائیں، ریلوے اسٹیشنوں پر اردو میں تختیاں لگائی جائیں، لوگوں کو اُردو میں اطلاعات فراہم کرائے جائیں اور ساتھ ہی اردو اسکولوں کو ہندی اسکولوں میں ضم کرنے کی کوشش نا کی جائے۔
امارت شرعیہ کے قائم مقام ناظم مولانا محمد شبلی القاسمی نے اطلاع دی ہے کہ 2021 کو ترغیب تعلیم اور تحفظ اُردو کے لئے امارت شرعیہ وقف کرے گی۔ انہوں نے کہا کہ اُردو ریاست کی دوسری سرکاری زبان ہے۔ اس کے ساتھ نا انصافی نہیں ہو نے دی جائے گی۔ انہوں نے کہا کہ وہ تمام محکموں سے تفصیلی رپورٹ منگا رہے ہیں۔
