ریاست بہار کے شہر بیتیا کی چار سگی بہنوں نے اپنے شوق اور قابلیت کی بنا پر یہ ثابت کردیا ہے کہ فلمی مکالمے صرف فلموں تک ہی نہیں محدود ہوتے ہیں بلکہ حقیقی زندگی میں بھی ان فلموں کے مکالمے بالکل سچ ثابت ہوتے رہتے ہیں۔
ایسا ہی فلم دنگل کا ایک مکالمہ ’ہماری چھوریاں چھوروں سے کم نہیں ہوتی‘ میں بھی کافی زیادہ مشہور ہوا تھا جو کہ بیتیا کی ان سگی بہنوں پر صادق آتا ہے۔
شیام کشور پرساد اور ان کی اہلیہ چنتا دیوی کی چھ بیٹیاں ہیں جن میں سے چار بیٹیاں نیہا، نیشا، ممتا اور سونالی نے اپنی صلاحیتوں کے بنا پر ایک بار نہیں بلکہ متعدد دفعہ ملک اور ریاست کا نام روشن کیا ہے۔
یہ چاروں بہنیں کیرم چمپیئن ہیں، جنہوں نے کیرم بورڈ پر اپنی انگلیوں کی مہارت کا مظاہرہ کرتے ہوئے متعدد قومی اور بین الاقوامی خطاب اپنے نام کرچکی ہیں۔
ان میں سے دو بہنیں ممتا کماری اور نشا کماری قومی اور بین الاقوامی سطح پر کیرم کے بہت سے مقابلے کھیل چکی ہیں۔جبکہ نہا اور سونالی نے قومی سطح پر بہت سے مقابلے کھیلے ہیں۔
سنہ 2017 میں ممتا اور نشا نے چنئی میں منعقدہ بین الاقوامی کیرم مقابلہ انڈو-مالدیپ سیریز میں بھارت کی ٹیم میں شمولیت اختیار کی۔
اور ممتا کی کپتانی میں یہ سریز بھارت کے نام رہی جس کے لیے ممتا کو بھارت کی بہترین کھلاڑی کا ایوارڈ دیا گیا۔
سنہ 2019 میں دوسری بار مالدیپ میں بین الاقوامی مقابلہ منعقد ہوا جس میں انڈو مالدیپ سیریز میں ممتا کی کپتانی میں یہ سیریز بھی بھارت کے نام رہی۔ ان بہنوں نے یک بعد دیگرے سات قومی خطاب کا اعزاز اپنے نام کیا ہے۔
بیتیا کی حقیقی بہنوں کی ابتدائی تعلیم چنپٹیا میں ہی ہوئی تھی۔ سنہ 2006 میں چنپٹیا میں منعقدہ ریاستی سطح کے کیرم مقابلہ سے متاثر ہوکر بڑی بہن نیہا نے کیرم کھیلنا شروع کیا اور آہستہ آہستہ نیہا کی تین دیگر بہنوں نے بھی کیرم کھیلنا شروع کردیں۔
کیرم بورڈ پر انگلیوں کی مہارت دکھانے والی حقیقی بہنوں کا کہنا ہے کہ وہ ملک کا نام روشن کرنا چاہتی ہیں لیکن حکومت کی طرف سے کسی بھی قسم کا تعاون نہیں مل رہا ہے۔
نیشنل فیڈریشن اور بہار ریاست کے توسط سے ان کا انتخاب تو کیا جاتا ہے لیکن ملک سے بیرون ممالک تک جانے کے لیے انہیں خود اپنے اخراجات برداشت کرنے پڑتے ہیں، حکومت کی طرف سے کوئی مدد نہیں مل رہی ہے۔
حقیقی بہنوں کے والد کا کہنا ہے کہ میری چار بیٹیاں کسی بیٹے سے کم نہیں ہیں، وہ گھر کے تمام کام کرتی ہیں جو ایک بیٹا کرتا ہے، گھر سے باغیچہ تک کے کام میں وہ اپنے والد کی مدد کرتی ہیں تاکہ گھر میں بیٹے کی کمی محسوس نہ ہو۔ باپ شیام کشور پرساد اور والدہ چنتا دیوی کو اپنی پیاری بیٹیوں پر فخر ہے۔
سوال یہ پیدا ہوتا ہے کہ جب حکومت کھیلوں کے نام پر کروڑوں روپے خرچ کررہی ہے تو ان ہونہار حقیقی بہنوں تک حکومت کی رسائی کیوں نہیں ہوپارہی ہے؟
