اترپردیش کے نوئیڈا کوتوالی سیکٹر-58 کے علاقے میں 19 نومبر کو بارات کے دوران روپے سے بھرا بیگ لوٹ کر فرار ہوئے دو بدمعاشوں(Thugs Arrested in Noida) کو پولیس نے ایک تصادم میں گرفتار کر لیا ہے۔
اے ڈی سی پی نوئیڈا زون رن وجے سنگھ نے بتایا کہ پولیس کے ساتھ تصادم میں ایک بدمعاش زخمی ہوا، جسے علاج کے لیے اسپتال میں داخل کرایا گیا، جبکہ دوسرے بدمعاش کو بھی تلاشی کے دوران گرفتار کر لیا گیا۔
واضح رہے کہ 19 نومبر کو نوئیڈا کوتوالی سیکٹر-58 علاقے میں دو بدمعاش سونو اور راہول بارات کی رسم کے دوران ایک باراتی سے پیسوں سے بھرا بیگ چھین کر فرار ہو گئے تھے۔
واقعے کے بعد پوچھ گچھ کے دوران باراتیوں نے پولیس کو بتایا تھا کہ بیگ میں لاکھوں روپے تھے جب کہ تفتیش کے دوران پولیس کو معلوم ہوا کہ واردات کے وقت بیگ میں صرف 75 ہزار روپے تھے۔ واقعہ کے بعد پولیس بدمعاشوں کی مسلسل تلاش میں لگی ہوئی تھی۔ اس دوران کوتوالی سیکٹر-58 پولیس کو اطلاع ملی کہ پیسوں سے بھرا بیگ لوٹنے والے دونوں بدمعاش سیکٹر 62 میں واقع پارک کے قریب آنے والے ہیںڈ اس جح بعد پولیس نے محاصرہ کرکے چیکنگ شروع کی اور دو مشکوک موٹر سائیکل سوار کو روکا گیا۔ پولیس نے جیسے ہی انہیں رکنے کا اشارہ کیا وہ دونوں موقع سے بھاگنے لگے اور دونوں بدمعاشوں نے پولیس پر فائرنگ کردی۔
پولیس کی جوابی فائرنگ میں ایک بدمعاش سونو کی ٹانگ میں گولی لگی جس کی وجہ سے وہ زخمی ہوگیا جب کہ دوسرا بدمعاش راہول کو کومبنگ کے دوران گرفتار کرلیا گیا۔پولیس نے بتایا کہ دونوں سے ایک بیگ برآمد ہوا جس میں 52 ہزار روپے برآمد ہوئے۔ اس کے ساتھ لوٹ کی واردات میں استعمال ہونے والی موٹر سائیکل بھی پولیس نے برآمد کر لی ہے۔
اے ڈی سی پی رن وجے سنگھ نے بتایا کہ گرفتار شر پسندوں کا تعلق شاطر لٹیرے گینگ سے ہے۔ ان کے خلاف موبائل فون، چین اسنیچنگ، لوٹ، مار پیٹ اور قتل کے مقدمات پہلے سے ہی درج ہیں۔
