ریاست مہاراشٹر کے دارالحکومت ممبئی سے متصل تھانے میں ممبرا بھیونڈی سمیت دیگر مضافاتی علاقوں میں گزشتہ شب سے ہو رہی مسلسل بارش سے شہر کے اہم شاہراہ بازار زیرِ آب ہو گئے ہیں۔
مقامی لوگوں کا کہنا ہے کہ بھیونڈی شہر کے مارکیٹ میں سیلابی کیفیت پیدا ہو گئی اور سینکڑوں دوکانوں، مکانوں، اور پاورلوم کارخانوں میں بارش کے پانی کے بھر جانے کے سبب شہریوں کی لاکھوں کی املاک تباہ و برباد ہو گئی ہے۔
ممبئی ناسک شاہ راہ پر سفر کرنے والوں کے مطابق گزشتہ شب سے ہونے والی بارش نے شہریوں کی زندگی کو زبردست متاثر کیا ہے۔ آس پاس کے علاقے کے لوگوں نے بتایا کہ ممبئی ناشک شاہراہ، بھیونڈی واڑہ، بھیونڈی تھانے اور بھیونڈی پارول روڈ پر پانی بھرنے سے ٹریفک جام لگا ہوا ہے۔ اس شاہراہ سے گزرنے والوں کو شدید دشواریوں کا سامنا کرنا پڑ رہا ہے۔
ایک شخص نے بتایا کہ شہر کے مسلم اکثریتی علاقے غیبی نگر، انصار نگر، دھوبی تالاب، نائگاؤں، ملت نگر، اسلام پورہ، نظام پورہ علاقے میں بارش کے پانی سڑکوں پر نظر آ رہا ہے۔ نالوں کی صفائی بہتر طریقے سے نہ ہونے کے سبب شہریوں میں کارپوریشن کی نا اہلی کے سبب شدید ناراضگی ہے۔
