مہاراشٹر میں ایک بار پھر سے کورونا وائرس کے مریضوں میں اضافے کے سبب ریاستی حکومت نے تمام میونسپل کارپوریشن کو یہ ہدایت دی ہے کہ وہ اپنے حدود میں آنے والے تمام اسکولز، کالجز اور کوچنگ کلاسز کے ساتھ شادی ہال وغیرہ کو صورتحال کے پیش نظر بند کرنے کے احکامات جاری کرسکتے ہیں۔
اس تعلق سے مالیگاؤں میونسپل کارپوریشن انتظامیہ نے 9 مارچ سے 31 مارچ تک تمام تعلیمی اداروں کو بند کرنے کا حکمنامہ جاری کر دیا ہے، جس کے باعث ایک بار پھر سے ہزاروں طلبہ و طالبات کی تعلیم متاثر ہو رہی ہے کیونکہ شہر مالیگاؤں کے ہر گھروں میں انٹرنیٹ کی سہولت دستیاب نہیں ہے جو آن لائن تعلیم کے حصول میں سب سے بڑی رکاوٹ ہے۔
ایسی صورت میں طلبہ و طالبات اسکول کے کمرے تک نہیں پہنچ سکتے، اس لیے اسکولوں کو بچوں تک تعلیم کو پہنچانے کیلئے ٹیکنالوجی کے تقاضوں کے مطابق اپنے معیار کو بلند کررہی ہیں اور بچوں کے تعلیمی تسلسل کو جاری رکھنے کے لیے ڈیجیٹل کشتی میں سوار ہونا پڑرہا ہے۔
واضح رہے کہ انتظامیہ کی جانب سے شہر کے تمام اسکولوں کو بند رکھنے کا حکم جاری ہونے کے بعد شہر کی کئی سیاسی و سماجی تنظیموں نے انتظامیہ سے مطالبہ کیا کہ کم از کم دسویں، بارہویں جماعت کے طلبا کو اسکول بلانے کی اجازت دی جائے تاکہ ان کے رزلٹ اور مستقبل پر کوئی منفی اثر نہ پڑے لیکن اس ضمن میں انتظامیہ نے کوئی متعین کن جواب نہیں دیا.
