ان میں سے کل رات تک 30 نئے مریض پائے گئے تھے اور آج صبح سے دوپہر تک مزید 23 نئے مریض ملے ہیں۔ جس کے بعد یہاں حالات تشویشناک صورت اختیار کرتے جا رہے ہیں۔
اس سے جہاں ایک طرف مریض اور ان کے افراد خاندان کو مختلف نوعیت کی پریشانیوں کا سامنا کرنا پڑ رہا ہے۔ کوئی زیرِعلاج مریض خوف کے باعث دواخانے سے فرار ہو رہا ہے تو دوسری طرف محکمہ صحت، ضلع اور میونسپل انتظامیہ کی ذمہ داریوں اور فکر مندی میں دن بدن اضافہ ہی ہوتا جا رہا ہے۔
ڈویژنل کمشنرسنیل کیندریکر، پولیس کمشنر چرنجیو پرساد، میئر نند کمار گھوڑلے، میونسپل کارپوریشن کی ہیلتھ آفیسر ڈاکٹر نیتا پڈالکر، سول سرجن ڈاکٹر پرمود کلکرنی و دیگر عہدیدارن اپنے اپنے عملے کے ساتھ دن رات اپنے فرائض انجام دینے میں مصروف ہیں۔
اورنگ آباد میں کورونا وائرس کے نئے مریضوں کے ملنے کا سلسلہ جاری ہی ہے۔ کل رات تک یہاں 30 نئے مصدقہ مریض ملے تھے۔
تاہم آج دوپہر تک ان میں 23 مریضوں کا اضافہ اور ہوا ہے اور 24 گھنٹوں کے درمیان پازیٹیو رپورٹ آنے والے مریضوں کی تعداد 53 ہو گئی ہے جس کے بعد عوام میں خوف و ہراس بڑھ گیا ہے۔ اب اورنگ آباد میں جملہ مریضوں کی تعداد 105 ہو چکی ہے۔
دریں اثناء کورونا وائرس کی ایک مصدقہ خاتون مریضہ نے چوری چپھے اسپتال سے راہ فرار اختیار کی تھی، تاہم اطلاع ملتے ہی شہر کی ایم آئی ڈی سی پولیس نے اسے تلاش کر کے فوری دوبارہ اسپتال میں داخل کرا دیا۔ اس کے خلاف مقدمہ درج کیا گیا ہے۔
اچانک اس بڑی تعداد میں مریضوں کے پائے جانے کے سلسلے میں ڈیویژنل کشمنر سنیل کیندریکر نے کل ہی وضاحت کر دی ہے کہ اب مشتبہ افراد کی جانچ کرنے کے عمل میں اضافہ کیا گیا ہے اور زیادہ تعداد میں جانچ کی جا رہی ہے، دوسری وجہ یہ ہے کہ اب مصدقہ مریضوں کے ربط میں آنے والوں کی تلاش کرنے اور ان کی جانچ کرنے کے عمل میں بھی نمایاں اضافہ ہوا ہے۔
سول سرجن ڈاکڑ کلکرنی نے بتایا کہ آج جو مریض ملے ہیں وہ شہر کے الگ الگ علاقوں سے تعلق رکھتے ہیں، ان میں 16 برس سے کم عمر کے 6 بچے شامل ہیں۔ ان کے علاوہ ان میں مرد و خواتین بھی شامل ہیں۔
