وزیراعلیٰ نے ممبئی کے تمام میونسپل وارڈ میں سرکاری ڈاکٹروں کی ایک ٹیم کو روانہ کرنے کے احکامات جاری کیے جو ہر شخص کا خون کا نمونہ حاصل کرنے کے بعد اس کی تشخیص کرے گی۔
واضح رہے کہ ممبئی کا شمار گنجان آبادی والے شہروں میں ہوتا ہے اور ریاست کے تمام اضلاع میں سب سے زیادہ آبادی ممبئی شہر کی ہے۔
وزیراعلیٰ نے گزشتہ دیر شب اعلیٰ سرکاری افسران اور میونسپل افسران سے ویڈیو کانفرنسنگ کے ذریعے حالات حاضرہ پر سیر حاصل گفتگو کی اور اس کے بعد یہ فیصلہ کیا کہ اس بیماری کے خلاف جنگی پیمانے پر اقدامات کیا جانا ضروری ہے لہٰذا تمام شہریوں کو اس مرحلے سے گزرنا ہوگا۔
وزیراعلیٰ ادھو ٹھاکرے نے اس موقع پر ممبئی میونسپل کارپوریشن کے کمشنر پروین پردیسی کی جانب سے کورونا وائرس کا مقابلہ کرنے والے اقدامات کا بھی جائزہ لیا اور یہ حکم صادر کیا کہ اس تعلق سے جتنی طبی سہولیات مہیا کرانی چاہیے ان تمام کومکمل طور سے نافذ کیا جائے نیز ورلڈ ہیلتھ آرگنائزیشن نے اس ضمن میں جو رہنمایانہ اصول مرتب کیے ہیں اس پرسختی سے عمل کیا جائے۔
واضح رہے کہ ممبئی میں اب تک 320 افراد اس مرض میں مبتلا پائے گئے ہیں جبکہ تھانے میں 221 افراد پازیٹیو پائے گئے ہیں۔ شہر کے مختلف علاقوں اور رہائشی عمارتوں کو بھی کورونا وائرس کے مریض ملنے کے بعد مکمل طورپر سیل کردیا گیا ہے جس میں آگری پاڑہ، ورلی اور دیگر علاقے شامل ہیں۔
