الزام ہے کہ سابق پولیس اہلکار نتن گائکواڑ نے جگو قدم نامی شخص کے خلاف دھوکہ دہی کی ہے۔
نتن گائکواڑ کے خلاف ممبئی کے ایم آر اے مارگ پولیس تھانے میں دھوکہ دہی کا معاملہ درج کیا گیا ہے۔
ملزم نے جگو قدم کو مہاڈا میں گھر دلانے کا سبز باغ دکھایا اور کئی لاکھ روپیہ لے لیے۔ لیکن مدتوں بیت جانے کے بعد نہ گھر کا پتا اور نہ ہی ملزم کا پتہ، جس کے بعد انہوں نے پولیس تھانے کا رخ کیا اور اس کے خلاف معاملہ درج کرایا۔
در اصل ملزم پہلے مہاراشٹر کے ریاستی وزیر سچن اہر کی حفاظتی دستے میں معمور کیا گیا تھا۔ یہیں سے ملزم نے اس بات کا فائدہ اٹھا کر لوگوں کو اپنے جال میں پھنسانے کی کوشش کرنے لگا۔ ملزم نے کئی لوگوں کو اپنا شکار بنایا ہے۔ ممبئی کے متعد جگہوں پر لوگوں کو اس نے گھر دلانے کے نام پر ان سے لاکھوں روپے ٹھگ لیے۔ لیکن نہ تو انہیں گھر ملا اور نہ ان کے پیسے۔
دراصل ممبئی میں کم قیمت کی لالچ میں لوگ گھر کی تلاش میں رہتے ہیں اور اسی وجہ سے ایسے لوگوں کے جال میں پھنس جاتے ہیں۔ حالانکہ ملزم کو محکمہ پولیس سے برطرف کر دیا گیا ہے لیکن جن لوگوں کے اس نے پیسے ہضم کر لئے وہ آج بھی در در کی ٹھوکر کھا رہے ہیں۔
