اس مہم کے تحت قوانین کی خلاف ورزی کرنے والے افراد کا چالان نہ کاٹ کر مردوں کو پھولوں کا ہار اور خواتین کو گلاب دے کر ان کی غلطیوں کا احساس دلایا جا رہا ہے۔
ای ٹی وی بھارت سے بات کرتے ہوئے میرٹھ ٹریفک ایس پی سنجیو واجپئی نے بتایا کہ 'ٹریفک پولیس کا مقصد چالان کرنا نہیں ہوتا ہے بلکہ قوانین پر عمل کرانا مقصود ہوتا ہے اس لیے میرٹھ پولیس نے چالان نہ کاٹ کر لوگوں کو پھول اور ہار پہنا کر غلطیوں کا احساس دلا رہی ہے۔'
ایس پی سنجیو واجپئی نے بتایا کہ موٹر گاڑی ترمیمی بل پر میرٹھ پولیس نے سختی سے عمل کرایا ہے جس کے نتیجے میں 33 فیصد سڑک حادثات میں کمی درج کی گئی ہے۔
انہوں نے بتایا کہ اس سے قبل موٹر گاڑی ترمیمی بل نافذ ہونے کے بعد عوام اور پولیس کے مابین کچھ جھڑپیں بھی ہوئیں ہیں اس لیے بھی پولیس نے فیصلہ کیا کہ اب چالان نہ کر کے پھول اور ہار سے ان کو قوانین سمجھایا جائے گا۔ یہی وجہ ہے کہ جب ٹریفک پولیس نے کمشنری چوراہے پر اس مہم کے ابتداء کی تو عوام صحافیوں کے کیمروں سے نظریں چراتے ہوئے دِکھ رہے تھے۔
انہوں نے کہا کہ اس سے قبل بھی ٹریفک قوانین پر عمل کرانے کے لیے مختلف بیداری پروگرام کیے گئے ہیں اور ایک یہ بھی مہم شروع کی گئی ہے جس کا الگ الگ نتیجہ سامنے آ رہا ہے۔
بہرحال اب دیکھنا یہ ہے کہ ٹریفک پولیس کے اس انوکھی پہل کے بعد عوام کی جانب سے کیسا رد عمل سامنے آتا ہے۔ کیا عوام ٹریفک قوانین پر عمل کرے گی یا پولیس کو دوبارہ اپنا سخت رویہ اپنانا پڑے گا۔
