ریاست اترپردیش کے ضلع بہرائچ میں تھانہ رسیا کے ایک یومیہ مزدور میں کورونا مثبت پائے جانے کے بعد سے انتظامیہ سرگرم ہوگیا ہے۔
کورونا وائرس کے انفیکشن سے بچنے کے لیے ابھی تک کوئی بھی ویکسین تیار نہیں کی جاسکی ہے جس کے سبب اس وبا سے بچنے کا واحد راستہ لاک ڈاؤن کی پیروی کرنا اور سماجی ْفاصلے کو برقرار رکھنا ہے لیکن اس کے باوجود بھی حکومت کے ان ہدایات پر لوگ پیروی نہیں کررہے ہیں۔
اس لیے اب ضلع کے ایس پی ڈاکٹر وپن کمار مشرا نے لاک ڈاؤن میں خود سڑکوں پر اتر کر اپنے سیکڑوں پولیس دستوں کے ہمراہ شہر کے مصروف ترین علاقوں میں پیدل مارچ کرکے لوگوں کو اس کی پیروی کرنے کی ہدایت کی۔
لوگوں کو رمضان المبارک کے موقع پر اپنے گھروں میں رہ کر نماز، تراویح اور عبادت کے لیے راضی کرنے کی کوشش کی اور تمام افراد اپنے گھر میں رہ کر لاک ڈاون کی پیروی کریں۔
پولیس کپتان نے بتایا کہ عوام کو تین مئ تک کسی بھی طرح کی کوئی اضافی چھوٹ نہیں رہے گی اور جو لوگ لاک ڈاؤن کی خلاف ورزی کرتے پائے جائیں گے انکے خلاف سخت کاروائی کی جائے گی۔
اسی لیے یہ مارچ کر کے لوگوں کو یہ پیغام دیا گیا ہے کہ انہیں 3 مئی تک اپنے گھروں میں ہی رہنا ہے اور اس طرح کا مارچ مستقل طور پر چلایا جائے گا تاکہ غفلت برتنے والے لوگوں میں کورونا کا خوف برقرار رہے۔
