بنگال میں بی جے پی میں قیادت کی تبدیلی ابھی نہیں :دلیپ گھوش

بی جے پی کے ریاستی صدر دلیپ گھوش نے بنگال میں فوری طور پر قیادت کی تبدیلی سے متعلق جاری خبروں کی تردید کرتے ہوئے کہا ہے کہ میری مدت میں ابھی ڈیڑھ سال باقی ہے اور میں نے کسی کے نام کی سفارش نہیں کی ہے۔

میڈیا میں یہ خبر گردش کررہی تھی کہ بنگال میں بی جے پی کی قیادت میں تبدیلی ہونی ہے اور دلیپ گھوش نے بالور گھاٹ سے ممبر پارلیمنٹ سکنٹ مجمدار کے نام کی سفارش کی ہے۔ دلیپ گھوش نے کہا کہ پارٹی کے سینئر لیڈروں کو سفارش کی ضرورت نہیں ہے۔وہ جنہیں چاہیں گے پارٹی کے دستور اور آئین کے مطابق ریاستی صدر کا انتخاب کریں گی ۔مگر ابھی میں ڈیڑھ سال تک پارٹی کی قیادت کروں گا۔

انہوں نے کہا کہ یہ خبر بے بنیاد ہے کہ میں نے بالور گھاٹ سے ممبر پارلیمنٹ کے نام کی سفارش کی ہے۔اسمبلی انتخابات کے نتائج کے بعد سے ہی یہ خبر گردش کررہی ہے کہ جلد ہی بنگال بی جے پی میں قیادت کی تبدیلی ہوسکتی ہے اورپارٹی کسی نئے چہرہ کو پارٹی کی قیادت سونپ سکتی ہے۔

یواین آئی