ترنمول کانگریس کے قومی جنرل سیکریٹری ابھیشیک بنرجی ،ممبر پارلیمنٹ ڈولا سین اور مغربی بنگال کے وزیر تعلیم برتیا باسو اور ترنمول کانگریس کے دیگر لیڈروں کے خلاف تری پورہ پولیس نے ایف آئی آر درج کیا ہے۔ان کے خلاف پولیس کے کام کاج میں روکاوٹ ڈالنے اور سرکاری احکامات کی خلاف ورزی کے الزامات عائد کیا گیا ہے ۔
تری پورہ کے ضلع کھوئی کے پولیس سپرنٹنڈنٹ (ایس پی) کرن کمار نے کہا کہ منگل کو ترنمول کانگریس کے لیڈروں کے خلاف ایک ازخود شکایت درج کی گئی ہے، جنہوں نے 8 اگست کو ڈیوٹی پر موجود افسران کے ساتھ’’بدتمیزی ‘‘کی تھی۔ہم نے ان کے خلاف 10 اگست کو سیکشن 186 (سرکاری ملازمین کی عوامی تقریب کے دوران رکاوٹ) اور سیکشن 36کے تحت مقدمہ درج کیا ہے ۔
ترنمول کانگریس کے ترجمان کنال گھوش جن کے خلاف بھی کیس درج کیا گیا ہے، نے کہا کہ ترنمول کانگریس کی مقبولیت سے بی جے پی خوف زدہ ہے ۔انہوں نے کہا کہ غلط طریقے سے ہمارے لیڈروں کے خلاف کیس درج کیا گیا ہے۔ہم وہاں اپنی پارٹی ورکروں کے ساتھ کھڑے ہونے کے لئے گئے تھے۔
اتوار کو ضلع کھوئی میں ترنمول کانگریس کے کم از کم 14 لیڈروں اور کارکنوں کو گرفتار کیا گیا تھا۔ابھیشیک بنرجی اور ترنمول کانگریس کے دیگر لیڈران تری پورہ میں بی جے پی حکومت کے ذریعہ گرفتار ترنمول کانگریس کے لیڈروں سے ملاقات کرنے کے لئے تھانہ پہنچے تھے۔گرفتاری کے بعد انہیں عدالت میں پیش کیا گیا جہاں انہیں ضمانت پر رہا کردیا گیا ۔پولیس کے مطابق ترنمول کانگریس کے 14 ارکان کو رات 7 بجے کرفیو کی خلاف ورزی کرنے کی وجہ سے گرفتار کیا گیا تھا۔
دوسری جانب ترنمول کانگریس نے الزام عائد کیا ہے کہ سیاسی بنیاد پر یہ کارروائی کی جارہی ہے۔تری پورہ میں ترنمول کانگریس کے کارکنان کو ہراساں کیا جارہا ہے ۔جھوٹے مقدمات کئے جارہے ہیں ۔پولیس انتظامیہ کا سیاسی فائدہ کےلئے استعمال کیا جارہا ہے۔
یواین آئی
