تلنگانہ: کریم نگر میں حاملہ خاتون سوائن فلو سے متاثر

شہر حیدرآباد کے گاندھی اسپتال میں سوائن فلو کے مشتبہ مریضوں پر نظر رکھی جارہی ہے۔محکمہ صحت کے حکام نے تصدیق کی کہ حاملہ خاتون جس کا تعلق ضلع کریم نگر سے ہے،سوائن فلو سے متاثر پائی گئی ہے۔

خاتون کوعلاج کے لئے اسپتال میں داخل کردیا گیا ہے۔گاندھی اسپتال میں موجودہ طورپر ایچ ون این وی اور کووڈ 19کی مثبت علامات والی مریض زیرعلاج ہیں جس کے نتیجہ میں اسپتال کے نگہداشت صحت کے ورکرس کے لئے چیلنج بن گیا ہے۔

اسی دوران نیشنل سنٹر فار ڈیزیز کنٹرول اور انٹی گریٹیڈ ڈیزیز سرویلینس پروگرام کے مطابق سوائن فلو سے متاثر ہونے کا زیادہ خطرہ بچوں، ضعیف افراد، حاملہ خواتین اور ہیلت ورکرس میں ہوتا ہے۔

شہرحیدرآباد کے فیور اسپتال کے سپرنٹنڈنٹ نے کہاکہ عوام کو چاہئے کہ وہ بہر صورت احتیاطی اقدامات کو یقینی بنائیں۔

انہوں نے شہریوں کو مشورہ دیا کہ وہ وہ شدید بخار‘ چھینک‘کھانسی اور بدن درد جیسی سوائن فلو کی علامات پر اسپتال سے رجوع ہوں۔

پرہجوم مقامات میں جانے سے گریز کریں‘ وقفہ وقفہ سے اپنے ہاتھ دھوتے رہیں‘ہاتھ ملانے سے گریز کریں‘ چھینک یا کھانسی آنے پر اپنے منہ پر ہاتھ رکھیں۔

انہوں نے کہاکہ حکومت کی جانب سے اسپتالوں کو مشورہ دیا گیا ہے کہ وہ سوائن فلو کے مشتبہ مریضوں کو علحدہ رکھنے کے اقدامات کریں۔