National Girl Child Day Program: 'بیٹیاں گھر کی عزت اور پہچان ہوتی ہیں'

ضلع انتظامیہ کشتواڑ نے نیشنل گرل چائلڈ ڈے National Girl Child Day کے موقع پر ایک تقریب کا انعقاد کیا۔ اس تقریب کا مقصد 'ایک روشن کل کے لیے لڑکیوں کو بااختیار بنانا' تھا۔

کشتواڑ: پورے ملک کے ساتھ ساتھ جموں وکشمیر کے ضلع کشتواڑ میں بھی نیشنل گرل چائلڈ ڈے National Girl Child Day منایا گیا، جس کا مقصد بیٹیوں کے حقوق سے لوگوں کو بیدار کرنے کے ساتھ ہی 'ایک روشن کل کے لیے لڑکیوں کو بااختیار بنانا' بھی تھا۔

تقریب کا افتتاح آئی سی ڈی ایس کشتواڑ نے کیا، جب کہ تقریب میں بطور مہمان خصوصی ایڈیشنل ڈپٹی کمشنر کشتواڑ کشوری لال شرما اور چیف ایجوکیشن آفیسر کشتواڑ پرہلادھ بھگت اور ڈپٹی ایس پی ہیڈکوارٹر ستیش کمار موجود تھے۔

اپنے خطاب میں اے ڈی سی کشوری لال شرما نے بیٹیوں کی شرح اموات میں اضافے پر تشویش کا اظہار کیا۔ انہوں نے کہا کہ 'بیٹی بچاؤ اور بیٹی پڑھاؤ' لاڈلی بیٹی اسکیم تا مختلف اسکیمز مرکز کی طرف سے نافذ العمل ہیں۔ اب مرکزی حکومت ہی بیٹی کا خرچہ اٹھا رہی ہے۔ ماں باپ کو بیٹی کے خرچہ کی اتنی پریشانی نہیں رہتی ہے۔

انہوں نے مزید کہا کہ بیٹیوں سے ہی گھر روشن ہے اور بیٹیاں ماں باپ کی شان ہوتی ہیں۔ اس دوران ایڈیشنل ڈپٹی کمشنر کشتواڑ نے کہا کہ جس گھر میں بیٹی نہیں، اس گھر میں برکت نہیں ہے۔