اعتکاف یعنی مساجد میں دس روز تک ایک یا ایک سے زیادہ لوگوں کا بیٹھ کر خدا کی عبادت کرنا اور تمام ضروریات یعنی سحری و افطاری سمیت دیگر چیزیں مسجد میں ہی کرنا۔
ریاست راجستھان کے دارالحکومت جے پور میں جماعت اسلامی ہند کے ریاستی سیکریٹری ڈاکٹر اقبال صدیقی نے اس تعلق سے ای ٹی وی بھارت کو بتا یا کہ اس مقدس ماہ رمضان میں احادیث کے مطابق اعتکاف جیسی عبادت کا کرنا ضروری ہوتا ہے۔ اگر کسی بستی میں ایک بھی شخص اعتکاف نہیں کرتا ہے تو پوری بستی گناہگار ہوتی ہے اور اگر کوئی ایک بھی شخص اعتکاف کر لیتا ہے تو پوری بستی کی جانب سے اعتکاف ادا ہوجاتا ہے۔'
صدیقی کا کہنا ہے کہ موجودہ وقت میں کورونا جیسی وبا کا قہر پورے عالم میں جا ری ہے۔ اس لیے ہمیں اس کورونا جیسی وبا سے محفوظ بھی رہنا ہے اور اعتکاف کا اہتمام بھی کرنا ہے۔
جو لوگ مساجد میں اعتکاف کر رہے ہیں وہ تمام لوگ سماجی دوری کا خاص خیال رکھیں اور جو بھی ایڈوائزری حکومت کی جانب سے جاری کی گئی ہیں اس کا بھی خاص خیال رکھا جائے، ایڈوائزری پر عمل کرنے سے ہمارا اعتکاف بھی صحیح طور پر ادا ہو گا اور ہم اس وبا سے بھی محفوظ رہیں گے۔
