ریاست راجستھان کے دارالحکومت جےپور سے عازمین حج کے لیے پہلی فلائٹ 18 جولائی کو جے پور میں واقع سانگا نیر ایئرپورٹ سے روانہ ہوگی۔
خیال رہے کہ یہ فیصلہ حاجیوں کی تعداد کے پیش نظر کیا گیا ہے۔
واضح رہے کہ گزشتہ دنوں حج کمیٹی کی جانب سے ایک شیڈول جاری کیا گیا تھا جس میں یہ بتایا گیا تھا کہ راجستھان سے حج کی پہلی فلائٹ 20 جولائی کو روانہ ہونی تھی، لیکن اب یہ پرواز 18 جولائی کو جے پور سے روانہ ہوگی۔
ذمہ داروں کے مطابق جیسے جیسے ویٹنگ لسٹ کلیئر ہورہی ہے ویسے ویسے حج کمیٹی اپنے فیصلوں میں رد و بدل کررہی ہے۔
راجستھان حج ویلفیئر سوسائٹی کے جنرل سیکرٹری حاجی نظام الدین نے بتایا کہ پہلی فلائٹ تو 20 تاریخ کو ہی جائے گی، لیکن حاجیوں کی تعداد کے پیش نظر سعودی ایئرلائنز کی جانب سے 18 تاریخ کو اضافی پرواز روانہ ہوگی، انہوں نے بتایا کہ یہ پرواز مکہ کے بجائے پہلے مدینہ جائے گی۔
