جے پور ہیریٹیج میونسپل کارپوریشن انتخابات کے چلتے کشن پول اسمبلی حلقے کے رکن اسمبلی امین کاغذی نے جالو پورہ علاقے میں قائم پولنگ بوتھ پر ووٹ ڈالنے کے بعد کانگریس پارٹی کا انتخابات میں نمایاں فتح حاصل کرنے کا دعویٰ کیا۔
کانگریس کے سینئر لیڈر اور رکن اسمبلی امین کاغذی نے حق رائی دیہی کے استعمال کے بعد میڈیا سے گفتگو کرتے ہوئے کہا: ’’جمہوریت کے اس تہوار کا ہر شخص کو مزہ لینا چاہیے، اور جس کسی بھی امیدوار نے عوام کے حق میں کام کیا ہے عوام کو چاہیے کہ اسے انتخابات میں کامیاب کرے۔‘‘
امین کاغذی نے دعویٰ کیا کہ ’’راجستھان کی عوام گہلوت حکومت سے کافی زیادہ خوش ہے اور ان انتخابات میں بھی کانگریس کے امیدوار ہی فتح حاصل کریں گے۔‘‘
انہوں نے کہا کہ ’’جے پور ہیرٹیج نگم ہو یا پھر گریٹر نگم، دونوں میں ہی ہمارا بورڈ بننے جا رہا ہے۔‘‘
کانگریس کے بعض کارکنان کی ناراضگی کے متعلق پوچھے گئے سوال پر امین کاغذی کا کہنا تھا کہ ’’ٹکٹ دیتے وقت کانگریس پارٹی کی جانب سے سبھی مذاہب اور برادری کے لوگوں کا خاص خیال رکھا گیا ہے، ایسے میں جن لوگوں نے گزشتہ دو برسوں میں کام کیا ہے ان کے کام کو مدنظر رکھتے ہوئے کانگریس پارٹی کی جانب سے ٹکٹ تقسیم کیے گئے ہیں۔‘‘
کانگریس لیڈر نے دعویٰ کیا کہ لوگوں میں کانگریس پارٹی کے تئیں کوئی ناراضگی نہیں ہے ’’سبھی لوگ ہمارے ساتھ ہی ہیں۔‘‘
واضح رہے کہ جے پور شہر ہیرٹیج میونسپل کارپوریشن انتخابات میں شام ساڑھے پانچ بجے تک ووٹنگ ہوگی۔
