تلنگانہ کے وزیر فائنانس ہریش راؤ نمائش سوسائٹی کے صدر مقرر

کل ہند صنعتی نمائش سوسائٹی نے اعلان کیا ہے کہ وزیر فائنانس ہریش راؤ کو سوسائٹی کا صدر منتخب کیا گیا ہے۔ قبل ازیں سابق وزیر ای راجیندر اس سوسائٹی کے صدر تھے۔

تلنگانہ میں اراضیات پر غیرمجاز قبضہ کے الزامات کے بعد ای راجیندر کو کابینہ سے برطرف کردیا گیا تھا جس کے بعد انہوں نے ٹی آر ایس پارٹی سے استعفیٰ دیتے ہوئے بی جے پی میں شمولیت اختیار کرلی۔ سابق وزیر نے بی جے پی میں شمولیت اختیار کرنے کے بعد کل ہند صنعتی نمائش سوسائٹی کی صدارت سے بھی استعفیٰ دے دیا تھا۔

نمائش سوسائٹی کے ارکان نے نیا صدر بننے کی درخواست کو ہریش راؤ کی جانب سے قبول کئے جانے پر ان کا شکریہ ادا کیا۔ سوسائٹی کے ارکان نے کیمپ آفس میں ہریش راؤ سے ملاقات کی۔ اس موقع پر وزیر فائنانس نے سوسائٹی کے ارکان کو یقین دہانی کروائی کہ وہ سوسائٹی کی ترقی کے لیے اقدامات کریں گے۔’

گزشتہ 80 برس سے یہ سوسائٹی حیدرآباد میں مشہور کل ہند صنعتی نمائش کا اہتمام کرتی آرہی ہے۔ ہریش راؤ نے کہا کہ وزیراعلیٰ کے چندر شیکھر راؤ کی رہنمائی میں سالانہ ہونے والی اس نمائش کو بین الاقوامی طور پر تسلیم کئے جانے کے لیے بھی اقدامات کئے جائیں گے۔

یو این آئی