ضلع گیا کے امام گنج تھانہ کی پولیس نے تین شاطر مجرموں کو گرفتار کیا ہے جن کے پاس سے ایک دیسی طمنچہ ، ایک پستول اور گولیاں بھی برآمد کی گئی ہیں۔
گرفتار بدمعاش علاقے کے تاجروں سے مختلف ناموں سے فون کرکے تاوان کی رقم کا مطالبہ کرتے تھے اور تاوان کی رقم نہ ملنے پر تاجروں پرحملہ کردیتے تھے۔
گزشتہ 19 اگست کی شام کو سونے چاندی کے زیورات کے تاجر ابھے کمار پر ان بدمعاشوں کے ذریعے حملہ کیا گیا تھا۔
ان بد معاشوں کی گرفتاری ضلع کے مختلف علاقوں سے ہوئی ہے گرفتار سبھی مجرم گیا کے خونخوار بدمعاش شوکت علی گروہ کے سرگرم رکن ہیں اور انکے خلاف ضلع کے مختلف تھانوں میں مقدمات بھی درج ہیں۔
ڈی ایس پی اجیت کمار نے بتایا کہ تاجروں سے لیوی کی رقم کامطالبہ کرنے والا اہم ملزم محمد امان اللہ عرف فلک سنگھ، مصطفی احمد اور پریتم سنگھ کوکچھ روز قبل گرفتار کیا گیا تھا جن سے پوچھ تاچھ کے بعد ہی جمعرات کو چھاپے ماری میں انظار عالم ، پپوانصاری اور انتخاب عالم کو انکے گھر سے گرفتار کیا گیا ہے۔
انہوں نے مزید بتایا کہ وہ شوکت علی خان گروہ کے لیے کام کرتے ہیں اور یہ گروہ بین ریاستی گروہ ہے اور گروہ کا سرغنہ شوکت علی کی گرفتاری کے لیے چھاپہ ماری کی جارہی ہے۔
