گیا: پیشہ وارانہ امتحانات کی تیاری کے لیے کوئز مقابلہ

ریاست بہار کے ضلع گیا میں پیشہ وارانہ امتحانات کی تیاری کے لیے کوئز مقابلے کا اہتمام گیا۔

کوئز مقابلے سے نوجوانوں کی صلاحیتوں کو نکھارنے کی مثبت شروعات کی گئی ہے، اس طرح کے کوئز مقابلے سے پیشہ وارانہ امتحانات کی تیاریاں کرنے والے نوجوانوں کو فائدہ پہنچے گا۔

ریاست بہار کے ضلع گیا میں گائتری شکتی پیٹھ کی جانب سے عام علمی مقابلہ منعقد ہوا۔ اس میں شہر کے کل 147 امیدواروں نے حصہ لیا۔

امتحان میں مجموعی طور پر 100 سوالات پوچھے گئے، جن میں ریاضی، استدلال، جنرل لالج، ہندی اور اخلاقیات سے متعلق سوالات شامل تھے۔ نوجوانوں کو ماہرین کے ذریعے شخصیت سازی، خاندان و معاشرے کی بہتر تعمیر کے بارے میں بتایا گیا۔ ہندی زبان میں پوچھے گئے سوالات امیدواروں کے لیے قدرے مشکل تھے۔اس موقع پر تمام امیدواروں کا تلک چندن لگاکر استقبال کیا گیا۔مگدھ یوتھ سیل کے ڈائریکٹر منیش کمار مشرا نے مقابلے کا بنیادی مقصد بتاتے ہوئے کہا کہ نوجوانوں کے اندر چھپی ہوئی صلاحیتوں کو ابھارنے کرنے کے لیے اس کاانعقاد ہواہے تاکہ وہ اپنے اعتماد کو بڑھا کر اپنے مقصد تک پہنچ سکیں۔ انہوں نے کہاکہ ہمارے ملک میں تقریبا 65 فیصد نوجوان ہیں تاہم ان میں سے بیشتر نوجوانوں کا اعتماد بہت کمزور ہے، غلط ماحول کی وجہ وہ اپنے حال اور مستقبل دونوں کو خراب کردیتے ہیں جو معاشرے کے لیے خطرناک ہے۔ انھوں نے کہا کہ ان تمام امورکے بارے میں مثبت فکر اور ان سے جڑے تمام پہلو نوجوانوں تک پہچانے کی ضرورت ہے۔سورج راوت نے کہا کہ سوامی ویویکانند کی 157 ویں یوم پیدائش کے موقع پر ایک ثقافتی اور اعزازی پروگرام کا انعقاد کیا جائے گا جس میں تمام امیدواروں کو تعریفی وتوصیفی سند سے نوازاجائیگا۔