ریاست بہار کے ضلع گیا کی پولیس نے خفیہ اطلاع پر ضلع کے مفصل تھانہ حلقہ کے جنک پور اور اشور چودھری ہالٹ سے اسلحہ اور شراب برآمد کیا ہے۔
پولیس اس معاملے میں ایک خاتون کوبھی گرفتار کرکے پوچھ گچھ کررہی ہے۔ حالانکہ اس دوران پولیس کو چکمہ دے کر دوشاطر بدمعاش فرار ہونے میں کامیاب رہے۔
پولیس نے بدنام زمانہ سندیپ عرف کالیا کے گھر چھاپہ ماری میں شراب اور اسلحہ برآمد کیا ہے۔ جبکہ اشور چودھری جنک پورمحلے میں راجو یادوکے گھر پربھی چھاپے ماری میں شراب اور اسلحے برآمد ہوئے ہیں۔
سٹی ایس پی راکیش کمار نے بتایا کہ گزشتہ روز خفیہ اطلاعات موصول ہوئی تھی کہ مفصل تھانہ حلقہ میں واقع جنک پور اور اشور ہالٹ میں بڑے پیمانہ پرشراب کی تسکری ہونے والی ہے، ساتھ ہی اسلحہ کی بھی خرید وفروخت ہونے ہیں، جس کے بعد ایس ایس پی کی ہدایت پر ان کی قیادت میں پولیس کی ایک خصوصی ٹیم تشکیل دی گئی۔
جس میں مفصل تھانہ سمیت تکنیکی شاخ کے افسران وجوان شامل تھے۔ پولیس کی ٹیم نے چھاپے ماری کر کالیا اور راجو یادو کے گھر سے شراب اوراسلحے برآمد کیے ہیں۔
پولیس نے ایک رائفل، دودیسی طمنچہ اور دیگر اسلحے کے ساتھ ان کے گھر سے ننانوے لیٹر شراب برآمد کی ہے۔
انہوں نے بتایا کہ کالیا اور راجو یادو کا پہلے بھی مجرمانہ ریکارڈ رہا ہے۔ اس کے خلاف پہلے سے مقدمات درج ہیں۔ پولیس اس کی گرفتاری کے لیے چھاپے ماری کررہی ہے، جلد ہی وہ پولیس کی گرفت میں ہوں گے۔
