ریاست بہار کے ضلع گیا میں واقع مگدھ یونیورسیٹی کی یوم تاسیس تقریب کا اہتمام کیا گیا جس میں مہمان خصوصی کی حیثیت سے ریاست کے گورنر فاگو چوہان نے شرکت کر کے طلبا و طالبات کی حوصلہ افزائی کی۔
تقریب کا افتتاح وزیر زراعت پریم کمار اور ان کے ایڈیشنل چیف سکریٹری برجیش ملہوترا نے شمع روشن کرکے کیا اور مگدھ یونیورسٹی کے وائس چانسلر پروفیسر راجندر پرساد نے گورنر کو مومینٹو اور شال پیش کرکے خیرمقدم کیا۔
یونیورسٹی یوم تاسیس کے موقع پر گورنر فاگو چوہان نے پرچم کشائی کے بعد قومی ترانہ بھی پڑھا گیا۔ گورنر نے یونیورسٹی کیمپس میں شجرکاری کے ساتھ ایک جم خانے کی بنیاد بھی رکھی۔
تقریب میں یونیورسیٹی کے طلباء وطالبات نے مختلف ثقافتی پروگرام پیش کیے۔ مگدھ یونیورسٹی کے 59 ویں یوم تاسیس کے موقع پر یونیورسٹی کے پروفیسر اور طلباء بڑی تعداد میں موجود تھے۔
واضح رہے کہ مگدھ یونیورسیٹی کا قیام 1961 میں عمل میں آیا تھا جس کو بودھ گیا کے ایک مٹھ نے عمارت کے لیے زمین کا ایک بڑا پلاٹ عطیہ کیا تھا۔ 1964 میں اسوقت کے صدر جمہوریہ ڈاکٹر رادھا کرشنن نے اس عمارت کی سنگ بنیاد رکھی تھی۔ 58 سال مکمل کرنے کے بعد یہ تیسرا موقع ہے کہ مگدھ یونیورسٹی میں یوم تاسیس تقریب منایا جارہا ہے۔
