دہلی کی ساکیت عدالت نے تبلیغی جماعت کے پروگرام میں حصہ لینے والے دو سو انڈونیشیائی شہریوں کی ضمانت منظور کرلی ہے۔ چیف میٹرو پولیٹن مجسٹریٹ گورموہینہ کور نے دو سو انڈونیشیائی شہریوں کو دس-دس ہزار روپے کے ذاتی مچلکے پر ضمانت دینے کا حکم دیا۔ اب تک 882 غیر ملکی شہریوں کو ضمانت منظور کی جاچکی ہے۔
گزشتہ 14 جولائی کو ساکیت عدالت نے انڈونیشیا کے ڈیڑھ سو شہریوں کی ضمانت منظور کی تھی۔ گذشتہ 11 جولائی کو عدالت نے تھائی لینڈ اور نیپال کے 75 شہریوں کی ضمانت منظور کی تھی۔ گذشتہ 10 جولائی کو عدالت نے ملائشیا کے 62 شہریوں اور سعودی عرب کے 11 شہریوں کو بری کیا تھا۔ میٹرو پولیٹن مجسٹریٹ سدھارتھ ملک نے ان 73 غیر ملکی شہریوں کو سات سے دس ہزارروپے جرمانے میں بری کرنے کا حکم دیا تھا۔
ان غیر ملکی شہریوں نے تصفیہ کے لئے درخواست دی تھی، جس کے بعد عدالت نے یہ حکم دیا۔ سماعت کے دوران لاجپت نگر کے ایس ڈی ایم نے ان غیر ملکی شہریوں کے خلاف شکایت کی اور لاجپت نگر کے اے سی پی اور نظام الدین کے انسپکٹر نے کہا کہ ان غیر ملکی شہریوں کی بریت سے انہیں کوئی اعتراض نہیں ہے۔ ساکیت عدالت نے 10 جولائی کو بنگلہ دیش کے 82 شہریوں کی ضمانت منظور کی تھی۔
