کانگریس پارٹی کے سابق صدر راہل گاندھی کل دوپہر اچانک دہلی کے رائوز ایوینو واقع دہلی کانگریس کمیٹی کے دفتر پہنچے اور ریاستی کانگریس کمیٹی کے ذریعہ کئے جا رہے راحتی کاموں کا جائزہ لیا۔ اس دوران انہوں نے یہاں نصف گھنٹے سے زیاوہ وقت گزارا۔
جائزہ کے دوران راہل گاندھی نے دہلی ریاستی کانگریس کمیٹی کے صدر انل چودھری سے راحتی کاموں سے متعلق تفصیلی جانکاری لی اور انہیں کچھ ہدایات دیں۔
واضح ہو کہ کانگریس کے ریاستی دفتر میں پھنسے ہوئے مزدوروں کا رجسٹریشن کیا جا رہا ہے اور ریاستی کانگریس کمیٹی کے ذریعہ کیچن چلایا جا رہا ہے۔
جب راہل گاندھی کانگریس دفتر پہنچے اس وقت کئی مزدور بھی وہاں موجود تھے جو اپنا رجسٹریشن کرانے آئے تھے۔ راہل گاندھی نے مزدوروں سے بھی بات کی اور ان کے مسائل کو سنا۔
واضح ہو کہ لاک ڈاؤن کے دوران دہلی کانگریس کمیٹی غریبوں کو راشن اور کھانا مہیا کرا رہی ہے۔ اس کے لئے پارٹی دفتر میں ایک کیچن چلایا جا رہا ہے۔ اس کے علاوہ کانگریس کارکنان صفائی مہم بھی چلا رہے ہیں۔
کانگریس صدر سونیا گاندھی کی ہدایات کے مطابق دہلی کانگریس نے پھنسے ہوئے مزدوروں کے ٹکٹ کی ذمہ داری لی ہے۔
کورونا وائرس کے دوران کانگریس رہنما راہل گاندھی مسلسل مرکزی اور ریاستی حکومت کو مشورہ دے رہے ہیں اور اس دوران کئی ماہرین سے بھی وبا سے نمٹنے اور دیگر معاملوں کے متعلق بات چیت کر رہے ہیں۔
