ملک کے 80 شہروں میں لاک ڈاؤن کے باوجود کل مختلف شہروں میں لوگ گھنٹی اور تالی بجاتے ہوئےسڑکوں پر نکلے تھے، جس پر وزیر اعظم نریندر مودی نے سخت ناراضگی کا اظہار کیا ہے۔
وزیر اعظم نے اپنے ٹویٹ میں لوگوں سے اپیل کی ہے کہ وہ لاک ڈاؤن کو سنجیدگی سے لیں ۔ ساتھ ہی ساتھ متعلہ ریاستی حکومتوں کو بھی کہا ہے کہ وہ قواعد اور ضوابط کو سختی سے نافذ کریں۔
وزیر اعظم نے ٹویٹ میں لکھا ہے کہ '' بہت سے لوگ ابھی بھی لاک ڈاؤن کو سنجیدگی سے نہیں لے رہے ہیں۔ براہ کرم اپنے آپ کو بچائیں، اپنے کنبے کو بچائیں، ہدایات پر سنجیدگی سے عمل کریں۔ میں ریاستی حکومتوں سے درخواست کرتا ہوں کہ وہ قواعد و ضوابط پر سختی سے عمل کرائیں۔''
اس کے علاوہ وزیراعظم نے تمام ریاستوں کو مکتوب لکھ کر لاک ڈاؤن کے متعلق قانوں و ضوابط کو سختی سے نافذ کرنےکی ہدایت بھی دی ہے۔ مکتوب میں ریاستی حکومتوں کو ہدایت دی گئی ہے کہ وہ اپنی ریاست میں کسی قسم کی ڈھیل نہ برتیں اور لوگوں کو بلا ضرورت جمع نہ ہونے دیں۔
واضح ہو کہ کل جب ڈاکٹروں، صحت ملازمین سمیت دیگر لازمی سہولیات میں مصروف لوگوں کی حوصلہ افزائی کے لئے لوگ پورے ملک میں اپنے گھروں کی بالکونی سے تالی، تھالی، یا گھنٹی بجا رہے تھے، اسی وقت ملک کے مختلف شہروں میں لوگ سڑکوں پر جلوس کی شکل میں نکلے تھے، جس سے وزیراعظم نریندر مودی نے غصے کا اظہار کرتے ہوئے انہیں گھروں میں رہنے کی تلقین کی ہے۔
