ریاستی بی جے پی کے دفتر میں وزیر اعلیٰ شیوراج سنگھ چوہان نے نامہ نگاروں کو بتایا کہ کانگریس کے رہنما نے انہیں بھوکے ننگے خاندان کا کہہ کر ان کا ہی نہیں، غریب اور غربت کی توہین کی ہے۔
چوہان نے کہا کہ غریبوں کی تذلیل کی وجہ سے انہیں تکلیف ہوئی ہے، لیکن اس سے متاثر ہوئے بغیر وہ غریبوں، محروموں اور ریاست کے دیگر طبقات کی ترقی کے لئے کام کرتے رہیں گے۔ کسانوں اور غریبوں کے مفاد کے لئے نافذ اسکیموں کو شمار کراتے ہوئے چوہان نے کہا کہ غریبوں کے مفاد میں مزید اسکیمیں بنائی جارہی ہیں۔
ریاستی بی جے پی صدر وشنودت شرما کی موجودگی میں چوہان نے سابق وزیر اعلی کمل ناتھ کو بھی نشانہ بنایا اور کہا کہ انہیں اپنی دولت، صنعت اور بڑے لوگ مبارک ہو۔ انہوں نے الزام لگایا کہ صنعتکار ہونے کی وجہ سے کمل ناتھ نے ریاست کے غریبوں، کسانوں اور دیگر محروم طبقات کے مفادات کا خیال نہیں رکھا۔ انہوں نے الزام لگایا کہ مسٹر کمل ناتھ کو ریاست میں ترقیاتی کام ہونے پراعتراض ہے۔ سابق وزیر اعلی کو عوام کے سامنے جھک جانے پر بھی اعتراض ہے اور وہ اکثر صرف فلمی ہیرو اور ہیروئنوں کو یاد کرتے ہیں۔
