سرکاری ذرائع کے مطابق ضلع مرینا کے سوماولی اسمبلی حلقہ میں ایک دو جگہوں پر فائرنگ کی اطلاع ملی ہے اور پولس نے فوری طور پر احتیاطی قدم اٹھائے ہیں۔ فائرنگ میں ایک شخص زخمی ہو گیا ہے۔ چار لوگوں کو حراست میں لیا گیا ہے۔
ریاست میں سبھی 28 سیٹوں پر ووٹنگ کے دوران کووڈ کے باوجود ووٹروں نے اپنے حق رائے دہی کا بڑھ چڑھ کر استعمال کیا۔ ووٹنگ صبح سات بجے شروع اور دوپہر دو بجے تک 63 لاکھ 67 ہزار سے زائد ووٹر حق رائے دہی کا استعمال کرچکے ہیں۔ اب ووٹنگ میں چار اور گھنٹے باقی ہیں۔ ووٹنگ کے دوران کورونا سے متعلق رہنما خطوط پر عمل کیا جا رہا ہے۔
سرکاری ذرائع کے مطابق ، ایک بجے تک تمام 28 حلقوں میں اوسطا 42.71 فیصد ووٹنگ درج کی گئی۔ ایک گھنٹہ بعد ، دو بجے یہ بڑھ کر پچاس فیصد ہو گئی۔ اگرملوا ، برہان پور ، ملیہرا ، ہاٹ پپلیا، باموری ، سانور ، سوواسارا ، بیاورا ، سرکھی ، کاریرا اور پوہڑی اسمبلی حلقوں میں رائے دہندگان میں کافی جوش و خروش دیکھنے کو ملا جبکہ گوالیار اور چمبل علاقوں میں ووٹنگ کم ہوئی ہے۔
مجموعی طور پر 9 ہزار 361 پولنگ اسٹیشنوں پر ووٹنگ جاری ہے اور شام 6 بجے ووٹنگ کا عمل مکمل ہوگا۔ ووٹوں کی گنتی 10 نومبر کو متعلقہ حلقہ یا ضلعی ہیڈ کوارٹر میں کی جائے گی۔
ضمنی انتخاب میں مجموعی طور پر 355 امیدواروں کی ساکھ داؤ پر لگی ہے ، جن میں 12 وزراء بھی شامل ہیں۔ 13 ہزار 115 بیلٹ یونٹ ، 13 ہزار 115 کنٹرول یونٹ اور 14 ہزار 50 وی وی پیٹ اضلاع میں ووٹنگ کرائی گئی ہے۔
