اپنے بے باک بیانات کی وجہ سے ہمیشہ تنازعات میں رہنے والے کانگریس کے سینیئر رہنما اور سابق رکن پارلیمان دگ وجے سنگھ نے کہا کہ میں نے ہمیشہ اپنی بات ثبوت، یقین اور مضبوطی کے ساتھ رکھی ہے اور کبھی بھی مجھے اپنے دیے گئے بیان کو واپس لینے کے لیے مجبور نہیں ہونا پڑا ہے۔
انہوں نے کہا مجھ پر آر ایس ایس، ایم آئی ایم اور رام دیو بابا کے ذریعے ہتک عزت کا کیس درج کیے جاتے رہے ہیں، کیونکہ میں نے ہمیشہ ان تنظیموں کے لیے یقین اور ثبوت کے ساتھ صحیح بات کہی ہے۔
انہوں نے مزید کہا کہ ایک طرف جہاں آر ایس ایس ہمارے سناتن دھرم کی بنیاد اور ان کے خیالات کے خلاف نفرت پھیلا رہی ہے، وہیں دوسری جانب ایم آئی ایم اور اویسی کے لوگ مسلمانوں میں بیان بازی کرکے نفرت پھیلانے کا کام کر رہے ہیں جس کی میں نے ہمیشہ مخالفت کی ہے اور کرتا رہوں گا۔
انہوں نے مزید کہا کہ میری بات بابا رام دیو کے بارے میں صحیح ثابت ہورہی ہے، اس لیے میں اپنی بات پر قائم ہوں اور ہمیشہ رہوں گا، چاہے اس کی جو بھی سزا ملے۔
