کرناٹک کے ضلع یادگیر میں جنتادل سیکولر پارٹی کے رہنما عبدالقیوم انعامدار نے ای ٹی وی بھارت سے خصوصی گفتگو میں کہا کہ 'مہاراشٹرا کے لاک ڈاؤن کا اثر ملک کی دیگر ریاستوں کے عوام پر بھی پڑ رہا ہے۔
مہاراشٹر کرناٹک کی پڑوسی ریاست ہے یہاں کے کئی لوگ روزگار کی تلاش میں مہاراشٹر کے شہر ممبئی اور پونے کا رخ کرتے ہیں۔ مہاراشٹرا میں لاک ڈاؤن کے بعد کئی نوجوان اپنے وطن کا رخ کررہے ہیں ایسے میں اگر کرناٹک میں بھی لاک ڈاؤن لگایا جائے گا تو عوام کا جینا محال ہو جائے گا۔
کیونکہ گذشتہ برس لگے لاک ڈاؤن کی وجہ سے کئی لوگوں کی زندگیاں خطرے میں پڑ گئی تھیں، خاص کر یومیہ مزدوری کرنے والے افراد دوبارہ لاک ڈاؤن لگنے کی خبروں سے بے حد پریشان اور فکر مند ہیں۔ عبدالقیوم انعامدار نے حکومت سے اپیل کیا کہ کرناٹک میں لاک ڈاؤن نہ لگایا جائے کیونکہ لاک ڈاؤن کورونا سے بچانےکا حل نہیں ہے۔
انہوں نے کہا کہ 'لوگوں کو چاہیے کہ وہ کورونا وائرس سے بچنے کے لیے احتیاطی اقدامات اور کورونا وائرس کی گائیڈ لائن دی گئی ہیں ان پر سختی سے عمل کیا جائے۔
عبدالقیوم انعامدار نے عوام سے اپیل کیا ہے کہ 'حکومت، محکمہ صحت اور ضلع انتظامیہ کی جانب سے کورونا وائرس کی روک تھام کے لیے جو احتیاطی اقدامات اٹھائے جا رہے ہیں ان پر سختی کے ساتھ عمل کیا جائے۔
