سیرت کوئز مقابلہ میں کامیاب طالبات کو رکن اسمبلی کنیز فاطمہ نے انعامات سے نوازا۔ اس موقع پر خطاب کرتے ہوئے انہوں نے کہا کہ گلبرگہ میں ہر سال میلاد النبیﷺ کے موقع طلبہ کے لیے حمد، نعت، قرات اور تقریری مقابلوں کا بڑے پیمانہ پر انعقاد کیا جاتا تھا تاہم گذشتہ دو سال سے کورونا وبا کی وجہ سے ان پروگرامز کو منعقد نہیں کیا گیا تھا۔
کنیز فاطمہ نے کہا کہ اسلامک کوئز مقابلہ کا دوبارہ آغاز کیا گیا۔ انہوں نے کہا کہ اس طرح کے پروگرامز کا آغاز سابق وزیر مرحوم قمرالاسلام نے کیا تھا جسے مرکزی سیرت کمیٹی کے ذریعہ منعقد کیا جاتا تھا۔
یہ بھی پڑھیں:
گلبرگہ: مسلم علاقوں میں کووڈ ٹیکہ کاری کیلئے میٹنگ
مرکزی سیرت مقابلہ جات کمیٹی کے صدر پروفیسر عبدالحمید اکبر نے بتایا کہ اس طرح کے پروگرامز منعقد کرنے کا مقصد طلبہ میں مذہبی تعلیم کے حصول کےلیے شوق بڑھانا ہے تاکہ طلبہ دنیاوی تعلیم کے علاوہ مذہبی تعلیم بھی حاصل کرسکیں۔ اسی مقصد کے تحت اسلامک کوئز مقابلہ کا اہتمام کیا گیا ہے جس میں 750 طالبات نے حصہ لیا۔ کامیابی حاصل کرنے والی طلبات کو رکن اسمبلی گلبرگہ شمال نے انعامات سے نوازا۔ اس موقع پر مرکزی سیرت مقابلہ جات کے صدر عبدالحمید اکبر، نا ئب صدر حیدر علی باغبان، فرازالاسلام کے علاوہ اسکول و کالج کے طلبہ اور سماجی، ملی و مذہبی رہنماؤں نے شرکت کی۔
