کرناٹک میں بقرعید کے موقع پر بڑے جانوروں کی قربانی پر پابندی

انسداد گئو کشی قانون کے نفاذ نے نہ صرف مسلمان بلکہ مویشیوں کے کاروباری و غریب ہندو دلت بھی متاثر ہوئے ہیں۔ ماہرین کا کہنا ہے عید الاضحی کے موقع پر کسان اپنے مویشی فروخت کرکے اچھی خاصی رقومات حاصل کرتے تھے۔ تاہم اس قانون کے نفاذ سے انہیں معاشی طور پر دھچکا لگا ہے۔

ریاست کرناٹک میں بی جے پی حکومت کی جانب سے انسداد گئو کشی قانون کے نفاذ کی وجہ سے رواں برس عید الاضحٰی کے موقع پر بڑے جانوروں کی ذبیحہ یا قربانی پر پابندی عائد کی گئی ہے۔

اس سلسلے میں بات کرتے ہوئے انسداد گئو کشی قانون کی مخالفت میں دائر کیے گئے مفاد عامہ کے عرضی گزار (پی آئی ایل کے پیٹیشنر) قاسم شعیب الرحمن قریشی نے کہا کہ بقرعید میں ایک بڑی تعداد میں بڑے جانور بیل اور سانڑھ کی خرید و فروخت ہوتی تھی جس سے ہزاروں کسان رواں برس محروم رہے اور اس سے نہ صرف جمعیت قریش و مسلمان بلکہ اس کاروبار سے جڑے بے شمار غریب ہندو و دلت لوگ بھی متاثر ہوئے ہیں۔

قانون کے نفاذ سے انہیں معاشی طور پر دھچکا لگا ہے

انسداد گئو کشی ایکٹ کے متعلق قاسم شعیب الرحمن قریشی نے عدلیہ سے انصاف کی امید ظاہر کی اور بتایا کہ وہ آنے والے دنوں میں کسانوں اور متعدد سماجی تنظیموں کے ساتھ مل کر بی جے پی کے اینٹی کیٹل سلاٹر ایکٹ 2020 کے خلاف ایک مضبوط ریاست گیر تحریک چلائیں گے۔

بقرعید کے موقع پر قربانی کے لیے بیرونی علاقوں سے لائے جارہے بڑے جانوروں کو محکمہ پولیس کی جانب سے ضبط کیا جارہا ہے۔ تاہم محکمہ پولیس کی جانب سے واضح طور ہر ہدایت جاری کی گئی ہے کہ ریاست میں جو انسداد گوکشی قانون کا نفاز ہے اس پر پوری طرح سے عمل کیا جائے گا۔