اورنگ آباد: خون کی قلت کے سبب بلڈ کیمپ کا انعقاد

اورنگ آباد میں کورونا وائرس کے مریضوں میں اضافہ ہونے کے ساتھ ساتھ بلڈ بنیک میں جمع خون میں بھی کمی واقع ہو رہی ہے جس کے سبب گلوبل میڈیکل فاؤنڈیشن کی جانب سے آج بلڈ کیمپ کا انعقاد کیا گیا۔

ریاست مہاراشٹر کے ضلع اورنگ آباد میں جہاں کورونا وائرس کے مریضوں میں مسلسل اضافہ ہورہا ہے وہیں بلڈ بینک میں بھی خون کی کمی واقع ہورہی ہے، اسی کمی کو دور کرنے کے لیے اورنگ آباد کی گلوبل میڈیکل فاؤنڈیشن کی جانب سے بلڈ کیمپ کا انعقاد کیا گیا جس میں چار بلڈ بینک کے ذمہ داروں نے شرکت کی۔

اس موقع پر تین سو سے زائد نوجوانوں نے اپنے خون کا عطیہ دیا، گلوبل میڈیکل فاؤنڈیشن کے ذمہ داروں کا کہنا ہے کہ مصیبت کے اس وقت میں نوجوانوں نے انسانیت کی بقا کے لیے جو پہل کی ہے اس کی جتنی ستائش کی جائے کم ہے۔

واضح رہے کہ اورنگ آباد کے بلڈ بینکوں میں ابھی صرف خون کا ایک چوتھائی اسٹاک ہے، جس کی وجہ سے شدید خون کی قلت کا سامنا ہے، بلڈ بینک کے ذمہ داروں نے ایسے کیمپ کے انعقاد کو وقت کی ضرورت بتایا ہے۔