ریاست مہاراشٹر کے اورنگ آباد شہر میں راستوں کی بدحالی کو لے کر عام آدمی پارٹی نے عجیب و غریب احتجاج درج کروایا ہے، احتجاج کے دوران راستے کے بڑے بڑے گڑھوں کو پھولوں کا ہار پہنایا گیا۔
جماعت اسلامی دفتر سے لے کر کٹ کٹ گیٹ راستے تک کافی گڑھے ہونے کی وجہ سے حادثوں میں بھی اضافہ ہو رہا ہے جس کی وجہ سے عام آدمی پارٹی کے کارکنان نے گڑھوں پر پھول کے ہار ڈال کر عجیب و غریب احتجاج کیا۔
عام آدمی پارٹی کے کارکنان کا کہنا ہے کہ اورنگ آباد میونسپل کارپوریشن دعویٰ کرتا ہے کہ وہ اسمارٹ سٹی کی طرز پر کام کر رہا ہے لیکن حقیقت اس کے برعکس ہے، اورنگ آباد میں اتنے زیادہ گڑھے ہوگئے ہیں کہ آج اورنگ آباد کو گڑھوں کا شہر کہا جارہا ہے۔
احتجاج کرنے والوں کا کہنا ہے کہ جب تک میونسپل کارپوریشن شہر کو گڑھوں سے نجات نہیں دلا دیتا تب تک عام آدمی پارٹی کے کارکنان احتجاج کرتے رہیں گے اور جو بھی راستوں کے کام کو لے کر کرپشن ہو رہا ہے اس پر بھی روک لگائیں گے۔
