خواجہ کے دربار میں پہنچے دو معصوم قوال

اجمیر شریف کے عرس میں عقیدت مندوں کا ہجوم دیکھا جا رہا ہے۔ ایسے میں خواجہ کے دربار میں اپنے عقیدت کا اظہار کرنے کے لیے ملک بھر سے قوال پہنچ رہے ہیں۔ عرس کی شاہی محفل کا حصہ بننے کے لیے آگرہ سے 2 معصوم قوال بھی اجمیر درگاہ پہنچے ہیں۔

اجمیر شریف عرس میں صوفیانہ قوالی کی محفل کا اہتمام کیا جاتا ہے، جس میں برصغیر سے صوفیانہ قوال اپنے اپنے انداز میں کلام پیش کرنے آتے ہیں۔ اس مرتبہ یوپی کے آگرہ سے بھی دو معصوم قوال اپنا کلام پیش کرنے کی خواہش لے کر اجمیر شریف آئے ہیں۔

معصوم قوال شہزان تاج اور فیضان تاج نے ای ٹی وی بھارت سے خصوصی گفتگو میں بتایا کہ وہ پہلی مرتبہ خواجہ معین الدین چشتیؒ کی بارگاہ میں پہنچے ہیں جہاں وہ " تیرا احسان ہے خواجہ" کلام پیش کریں گے اور اپنی زندگی کی کامیابی کی دعا کریں گے۔

خواجہ کی چوکھٹ سے اپنے مقدر کو روشن کرنے پہنچے آگرہ کے قوالوں کے ساتھ ان کی پوری پارٹی اجمیر پہنچ چکی ہے۔ جن کا درگاہ کے خادم سید قطب الدین سخی دستاربندی نے استقبال کیا۔