خلیج بنگال میں لا پریشر سرگرم ہونے کی وجہ سے گجرات میں شدید بارش ہونے کی پیش گوئی محکمۂ موسمیات نے کی ہے۔ تاہم گجرات میں اب تک 89 فیصد بارش درج کی گئی ہے۔
گجرات میں مسلسل بارش کی وجہ سے سیلابی صورت حال دیکھنے کو مل رہی ہے۔ خلیج بنگال میں لا پریشر کی وجہ سے 21 سے 24 اگست تک گجرات میں شدید بارش ہونے کا امکان ہے۔
محکمۂ موسمیات گجرات کے ڈائریکٹر جینت سرکار نے کہا ہے کہ بارش کا سسٹم چھتیس گڑھ اور مدھیہ پردیش کی جانب سے گجرات کی طرف بڑھ رہا ہے۔ جس سے آئندہ ہفتے تک شدید بارش ہونے کا امکان ہے جبکہ کچھ اضلاع میں صورت بہت زیادہ خراب ہو چکی ہے۔
محکمۂ موسمیات کی پیش گوئی کے مطابق شمالی گجرات کے بناس کانٹھا، سابر کانٹھا، مہسانہ، گاندھی نگر میں تیز بارش ہونے کا امکان ہے تو احمدآباد میں بھی ہلکی بارش کی توقع ہے۔ دوسری جانب کچھ سوراشٹر میں 22 اور 23 اگست کو تیز بارش ہونے کی وارننگ دی گئی ہے۔ تاہم 25 اگست کو گجرات میں بارش کم ہونے کا امکان ہے۔ اس کے علاوہ بارش کے ساتھ ساتھ محکمۂ موسمیات نے ماہی گیروں سے سمندروں میں نہ جانے کی اپیل بھی کی ہے۔
