لاک ڈاؤن کے دوران ریاست گجرات کے وزیر اعلیٰ وجے روپانی کے پرنسپل سیکریٹری اشونی کمار نے ایک پریس کانفرنس کے دوران کہا کہ ’’اب سے مچھواروں کو سمندر میں جانے دیا جائے گا اور وہ جہاز بھی چلا سکتے ہیں۔‘‘
اشونی کمار نے کہا کہ لاک ڈاؤن کے تعلق سے وزیراعظم نریندرمودی فیصلہ لیں گے، لاک ڈاؤن کو مزید بڑھانے کے لیے ابھی فی الحال کوئی فیصلہ نہیں لیا گیا ہے اور گجرات میں 14 اپریل تک لاک ڈاؤن کا عمل جاری رہے گا۔
انہوں نے بتایا کہ ریاستی حکومت نے ماہی گیروں کے لیے ایک اہم فیصلہ لیا ہے ’’ماہی گیروں کو سمندر میں جانے کی اجازت دی گئی ہے۔ ساتھ ہی مچھلی اور جھینگا کی برآمد و درآمد سے پابندی بھی ختم کر دی جائے گی۔‘‘
انہوں نے مزید بتایا کہ گجرات میں اب تک 9 لاکھ سے زیادہ فوڈ پیکیٹ تقسیم کیے جا چکے ہیں، لاک ڈاؤن کے دوران مطلوبہ خدمات کے لیے 3 لاکھ سے زائد پاس بھی جاری کر دیے گئے ہیں۔
واضح رہے کہ کوروناوائرس کو مزید پھیلنے سے روکنے کے لیے ملک بھر میں لاک ڈاؤن کا نفاذ ہے، اور اس وبا سے اب تک پورے عالم میں ایک لاکھ سے زائد جانیں تلف ہوئی ہیں۔
