سماج کو منشیات سے پاک رکھنے کے لیے اننت ناگ پولیس نے منشیات مخالف مہم کو مزید تیز کر دیا ہے۔ پیر کے روز پولیس کی جانب سے ضلع اننت ناگ کے دو الگ الگ مقامات پر دو منشیات فروشوں کو گرفتار کیا گیا ہے۔
تفصیلات کے مطابق مٹن پولیس تھانہ کی ایک پولیس پارٹی نے نانل کے مقام پر ایک ناکہ لگایا۔ ناکہ کے دوران ایک شخص نے مقام سے بھاگنے کی کوشش بھی کی۔ تاہم پولیس نے اسے دبوچ لیا۔
مذکورہ شخص کی شناخت ضلع اننت ناگ کے کریڈی زال نانل کے رہنے والے بلال احمد لون ولد محمد امین لون کی حیثیت سے ہوئی ہے۔ بلال کے قبضے سے 500 کلو گرام چرس جبکہ 9 کلو خشک بھنگ پاؤڈر بر آمد کیا گیا ہے۔
ادھر پولیس چوکی کھنہ کی جانب سے کھنہ بل چوک میں ایک ناکہ قائم کیا گیا تھا جس دوران ایک شخص سے 140 گرام چرس برآمد کی گئی ہے۔ اس شخص کی شناخت تکیہ بحرام صاحب کے رہنے والے نثار احمد گنائی ولد عبدالخالق گنائی کے طور پر ہوئی ہے۔
دونوں ملزمین کو پولیس نے گرفتار کر کے این ڈی پی ایس ایکٹ کے تحت معاملہ درج کیا ہے اور مزید تفتیش جاری ہے۔
