ریلائنس برانڈ لمٹیڈ نے سی بینّر انٹرنیشنل ہولڈنگس سے ہیملیز گلوبل ہولڈنگس لمٹیڈ کے صدفیصد شیئر کو خریدنے کا معاہدہ کیا ہے جو ہانگ کانگ میں لسٹیڈ ہے۔
ہیملیز کو 259 سال پہلے 1760 میں ولیم ہیملے نے لندن کے علاقے ہائی ہولبورن میں قائم کیا تھا۔
ہیملیز 50 ہزار سے زائد اقسام کے کھلونے بیچتی ہے جبکہ اس کے پاس ریل گاڑیوں کا نمایاں کلکشن موجود ہے۔
لندن میں واقع اس کی تاریخی دوکان میں ہر سال 50 لاکھ خریدار آتے ہیں۔
ہیملیز نے پہلی بار یوروپ سے باہر 2008 میں اردن کی دارالحکومت امان میں اپنی دوکان کھولی تھی اور 2010 میں اس نے بھارتی شہر ممبئی میں اپنی آوٹ لیٹ کا افتتاح کیا تھا۔ اب بھارت کے مختلف شہروں میں ہیملیز کی 88 دوکانیں موجود ہیں اور دنیا کے 18 ممالک میں اس کے 167 سٹورز ہیں۔
مکیش امبانی کی ریلائینس کمپنی بھارت کے 29 شہروں میں ہیملیز کے 88 سٹورز چلاتی ہے۔
سی بینر نے 2015 میں ہیملیز کو دس کروڑ پاؤنڈ کے عوض فرانسیسی کمپنی سے خریدا تھا۔ ریلائینس کی جانب سے خریدے جانے کے بعد یہ چوتھا موقع ہے کہ ہیملیز کی ملکیت تبدیل ہوئی ہے۔
