گذشتہ جمعہ کرائسٹ چرچ کی مساجد میں ہوئے دہشت گردانہ حملے کے بعد آج نیوزی لینڈ میں پہلی نماز جمعہ ادا کی گئی، خطبہ جمعہ میں نیوزی لینڈکی وزیر اعظم نے شرکت کی۔
مسجد النور میں جمعے کی اذان کے بعد شہدا کی یاد میں دو منٹ کی خاموشی اختیار کی گئی۔
نیوزی لینڈ کی وزیراعظم جسینڈا آرڈرن بھی اظہار یکجہتی کے لیے نماز جمعہ کے اجتماع میں موجود رہیں۔ سرکاری ٹی وی پر جمعے کی اذان کا راست نشریہ ہوا۔
واضح رہے کہ نیوزی لینڈ کی تاریخ میں یہ پہلی بار ہے کہ اذان جمعہ اور نماز جمعہ و خطبہ سرکاری ٹی وی پر براہ راست نشر کیا گیا۔
ادھر دہشت گردانہ حملہ کرنے والے برینٹن ٹیرنٹ کی کزن کا کہنا ہے کہ ٹرینٹ نے جو کیا ہے اس کے لیے انہیں سزائے موت ملنی چاہیے۔
انہوں نے مزید کہا کہ برنٹن ٹیرنٹ نے معصوم شہریوں کی جان لی ہے اس لیے وہ سزائے موت کا مستحق ہے۔
اس سے قبل کرائسٹ چرچ میں دہشت گردی کا شکار ہونے والی النور مسجد کی بحالی کا کام تیزی سے انجام دیا گیا۔
بڑھئی، باغبان، قالین بچھانے والے اور دیگر مزدوروں کی بڑی تعداد مسجد کی بحالی کے کام میں شریک رہے۔
پولیس اور انتظامیہ نے مسجد سے حملے کے تمام ممکنہ شواہد اور ثبوت حاصل کر لیے ہیں۔
