وادی کشمیر کے بچے ہی نہیں بلکہ یہاں کی بچیاں بھی ہر طرح کے کھیل کود میں اپنے ہنر سے وادی کا نام روشن کر رہی ہیں۔
ریاست جموں و کشمیر کے کئی اضلاع سے تعلق رکھنے والی یہ لڑکیاں ان دنوں گاندربل کے فزیکل کالج گراؤنڈ میں فٹبال کھیلتی نظر آرہی ہیں۔
کھیلوں سے ان کی محبت اور جذبے کا اندازہ اسی بات سے لگایا جاسکتا ہے کہ وادی میں موسلادھار بارش سے عام انسان اپنے گھروں میں سہما ہوا ہے تاہم یہ لڑکیاں گراؤنڈ میں فٹبال کھیل رہی ہیں۔
ای ٹی وی بھارت کے ساتھ خصوصی گفتگو میں انہوں نے کہا کہ وہ نہ صرف فٹبال کی شوقین ہیں بلکہ انہیں اس کھیل سے عشق کی حد تک لگاؤ ہے لیکن انہیں مناسب پلیٹ فارم نہیں ملتا کہ وہ اپنے ہنر کو دنیا کے سامنے دکھا سکیں۔
انہوں نے کہا وادی کشمیر میں بچیوں کو کھیل کود میں کافی کم دیکھا جا رہا ہے تاہم شوق وہ بھی رکھتی ہیں۔
انہوں نے کہا کہ محکمہ یوتھ سروس اینڈ سپورٹز کو چاہیے کہ وہ آگے بھی اس طرح کے پروگرامز کا انعقاد کریں تاکہ ہر کھلاڑی اپنے ہنر اور کھیل کا مظاہرہ کر سکے۔
واضح رہے کہ کی ریاست جموں کشمیر میں مرکزی حکومت کی اسکیم "کھیلو انڈیا" کے تحت ہر طرح کے کھیل کود کے مقابلوں کا انعقاد کیا جا رہا ہے جن سے کھلاڑیوں کو اپنا ہنر دکھانے کا موقع مل رہا ہے۔
ڈائیرکٹر جنرل یوتھ سروس اینڈ سپورٹز ڈاکٹر سلیم الرحمان نے بطور مہمان خصوصی شرکت کی اور کھلاڑیوں کی حوصلہ افزائی کی۔
