کاشی اسٹیشن کوئلوں کی لوڈنگ اور ان لوڈنگ کے لئے استعمال ہوتا ہے۔ وارانسی جنکشن اور وارانسی سٹی میں تو پہلے سے ہی کافی رونق تھی لیکن منڈوا ڈیہہ اسٹیشن پرانے زمانے کے کسی گاؤں کا اسٹیشن معلوم ہوتا تھا۔ یہ اسٹیشن جدید سہولیات سے عاری تھا۔ جہاں نہ بیٹھنے کی جگہ تھی اور نہ ہی دیگر سہولیات۔
گزشتہ چند برسوں میں اس اسٹیشن پر حکومت کی خاص توجہ رہی اور وزیراعظم نریندر مودی کے وارانسی پارلیمانی حلقے سے رکن پارلیمان بننے کے بعد اس کو جدید سہولیات سے آراستہ کیا گیا۔ اب یہ اسٹیشن بنارس کا سب سے خوبصورت اسٹیشن ہے جہاں جدید سہولیات کے ساتھ ساتھ خوبصورت تالاب اور دلکش فوارے بھی لگائے گئے ہیں۔ اس اسٹیشن پر گاڑیوں کی آمد و رفت کم ہے لیکن مسافروں کی توجہ اس جانب مرکوز کرنے کے لیے حکومت نے یہاں سے سفر کا آغاز کرنے والوں کے لیے ڈسکاؤنٹ کا بھی اعلان کیا تھا۔ اب دہلی جانے والی کئی گاڑیاں یہاں سے چلائی جا رہی ہیں۔
یہ اسٹیشن ایک طرح سے شہر کے قلب میں واقع ہے جس کی وجہ سے مسافروں کو یہاں سے ٹرین لینے میں کوئی دشواری نہیں ہوتی۔ مسافروں کی بڑھتی تعداد کے پیش نظر یہاں پر سواریوں کے لیے سہولیات بھی بہتر کی گئی ہیں۔ یہاں بھیڑ کم رہتی ہے اور اسٹیشن ہر وقت صاف ستھرا بنا رہتا ہے۔
اسٹیشن پر ان دنوں برقی سیڑھیاں اور لفٹ وغیرہ بھی لگا دی گئی ہیں، جس کی وجہ سے مسافروں کو اپنا سامان لے جانے اور لانے میں کافی سہولت ہوتی ہے۔
