کانگریس کی صدر سونیا گاندھی سمیت اپوزیشن کی 12 اہم جماعتوں کے رہنماؤں نے کورونا سے مسلسل خراب ہوتے حالات پر وزیراعظم نریندر مودی کو خط لکھ کر درخواست کی ہے کہ حکومت وبا سے نمٹنے کے لئے اپوزیشن کے مشورہ کو نظرانداز نہیں کرے۔
اپوزیشن جماعتوں کے رہنماؤں نے حکومت پر الزام لگایا کہ اس نے کورونا وبا سے نمٹنے کے لئے ان کے مشوروں کو نظرانداز کیا ہے یا جان بوجھ کر ٹھکرایا ہے۔ انہوں نے مرکز سے تمام شہریوں کو لازمی طور پر ٹیکہ لگانے کے لئے مہم چلانے کی بھی درخواست کی ہے۔
محترمہ گاندھی اور دیگر جماعتوں کے جن رہنماؤں نے وزیراعظم کو خط لکھا ہے ان میں جنتادل (ایس) کے ایچ ڈی دیوے گوڑا، نیشنلسٹ کانگریس پارٹی کے شردپوار، شیوسینا کے ادھو ٹھاکرے، ترنمول کانگریس کی ممتا بنرجی، ڈی ایم کے کے ایم کے اسٹالن، جھارکھنڈ مکتی مورچہ کے ہیمنت سورین، نیشنل کانفرنس کے فاروق عبداللہ، سماج وادی پارٹی کے اکھیلیش یادو، راشٹریہ جنتادل کے تیجسوی یادو، کمیونسٹ پارٹی آف انڈیا کے ڈی راجہ، اور مارکسی کمیونسٹ پارٹی کے سیتارام یچوری شامل ہیں۔
اپوزیشن کے ان رہنماؤں نے مرکزی حکومت سے ٹیکہ کی تیاری کے لئے گھریلو سطح پر لائنسنس لازمی کرنے، بجٹ میں مختص 35000کروڑ روپے کا ویکسنیشن کے لئے استعمال کرنے اور سنٹرل وسٹا پروجیکٹ پر فوری طورپر کام بند کرنے کی مانگ کی ہے۔
انہوں نے ٹیکہ کاری، آکسیجن اور کورونا سے لڑنے کے دیگر اقدامات کے لئے مرکز سے ریاستوں کی مدد کرنے اور بے روزگار نوجوانوں کو ہر مہینہ چھ ہزار روپے دینے کی بھی مانگ کی ہے۔
یو این آئی
