'تریپورہ میں مظالم ریاستی حکومت کی ناکامی کا نتیجہ ہے'

اسد الدین اویسی نے مرکزی حکومت پر نکتہ چینی کرتے ہوئے کہا کہ مودی حکومت کی خارجہ پالیسی پوری طرح سے ناکام ہوچکی ہے، کشمیر میں 370 کی منسوخی کے بعد بھی کچھ نہیں بدلا بلکہ ہمارے فوجی مارے جارہے ہیں، عام شہری مارے جارہے ہیں، پاکستان سے ڈرونز میں ہتھیار آرہے ہیں، ایسے حالات میں حکومت کیا کررہی ہے۔

ریاست مہاراشٹر کے خلد آباد علاقے میں مجلس اتحاد المسلمین کے قومی سربراہ اسد الدین اویسی نے الزام عائد کرتے ہوئے کہا کہ تریپورہ میں اقلیتوں پر جو مظالم ڈھائے جارہے ہیں وہ ریاستی حکومت کی ناکامی کا نتیجہ ہے۔

مولانا کلیم الدین صدیقی کی گرفتاری اور عمر گوتم کے معاملے کو لیکر اسد الدین اویسی نے سکیولر پارٹیوں کی خاموشی پر نشانہ سادھا، ان کا کہنا ہے کہ اقلیتوں کے ووٹوں پر حق جتانے والی سکولر پارٹیوں کا منہ اس وقت کیوں بند ہوجاتا ہے، جب مسلمانوں کو نشانہ بنایا جاتا ہے۔

انہوں نے کہا کہ ہمارے ملک میں اسی کی آواز سنی جاتی ہے جن کے پاس سیاسی طاقت ہے، اس لیے بھارت کی اقلیتوں کو یہ پورا حق ہے کہ وہ بھی اپنی قیادت کو پیدا کریں، یہی وجہ ہے کہ ایم آئی ایم ملک بھر میں اپنا دائرہ وسیع کررہی ہے۔

اترپردیش الیکشن کو لیکر اسد الدین اویسی نے امید ظاہر کی ہے کہ نتائج مثبت رہیں گے۔ انہوں نے کہا کہ ملک کی سب سے بڑی اقلیت کو زندگی کے ہر شعبے میں پیچھے کردیا گیا ہے، وجہ صاف ہے کہ قیادت کو ابھرنے نہیں دیا گیا۔

انہوں نے مرکزی حکومت پر نکتہ چینی کرتے ہوئے کہا کہ مودی حکومت کی خارجہ پالیسی پوری طرح سے ناکام ہوچکی ہے، کشمیر میں 370 کی منسوخی کے بعد بھی کچھ نہیں بدلا بلکہ ہمارے فوجی مارے جارہے ہیں، عام شہری مارے جارہے ہیں، پاکستان سے ڈرونز میں ہتھیار آرہے ہیں، ایسے حالات میں حکومت کیا کررہی ہے؟ مودی کے دور حکومت میں ملک کی سرحدیں محفوظ نہیں ہی۔