ریاست بہار کے ضلع ویشالی کا ایک ویڈیو سوشل میڈیا پر تیزی سے وائرل ہورہا ہے جس میں ایک ہندو شدت پسند کچھ لوگوں کی بے رحمی سے پٹائی کر رہا ہے۔ ویڈیو میں تمام مشتبہ افراد کی پٹائی کرنے والے شخص کی شناخت بجرنگ دل کے ضلع صدر آرین سنگھ کے طور پر کی جا رہی ہے، جو مخصوص مذہب کے لوگوں کی لاٹھی سے بے دردی سے پٹائی کر رہا ہے۔ الزام ہے کہ یہ تمام لوگ اپنا بھیس بدل کر علاقے میں بھیک مانگ رہے تھے۔ Suspected Youths Assaulted In Vaishali
وائرل ویڈیو میں واضح طور پر دیکھا جا سکتا ہے کہ کس طرح ہندو شدت پسند نوجوان فلم شعلے کے گبر سنگھ کی طرح گھوم رہا ہے اور چھ غریب نوجوانوں کو بے دردی سے پیٹ رہا ہے، جس کا ویڈیو سوشل میڈیا پر تیزی سے وائرل ہو رہا ہے۔ ویڈیو میں دیکھا جا سکتا ہے کہ غریب نوجوان زمین پر لیٹے ہیں اور جان کی بھیک مانگ رہے ہیں۔ اسی دوران ایک شخص ہاتھوں میں لاٹھی لیے گھوم رہا ہے اور باری باری انہیں پیٹ رہا ہے۔
وائرل ویڈیو دو دن پرانی بتائی جارہی ہے لیکن اب وائرل ہوگئی ہے۔ ویڈیو میں تمام مشتبہ افراد کی پٹائی کرنے والے شخص کی شناخت بجرنگ دل کے ضلع صدر آرین سنگھ کے طور پر کی جا رہی ہے۔ یہ واقعہ 24 جولائی کا ہے۔ جانکاری کے مطابق سٹی تھانہ علاقے کے کدم گھاٹ پر پولیس کی تحویل میں لینے سے پہلے سب کی پٹائی کی گئی۔ جس کے بعد پولیس موقع پر پہنچی اور تمام افراد کو حراست میں لے لیا۔
مزید پڑھیں:۔ Muslim Man Beaten in Ujjain: مسلم نوجوان سے بجرنگ دل کے کارکنان نے مار پیٹ کی
بجرنگ دل کے ضلع صدر آرین سنگھ نے الزام لگایا ہے کہ 'کئی دنوں سے یہ لوگ سادھو کے بھیس میں محلوں میں گھوم رہے تھے۔ یہ تمام لوگ بسہا بیل لے کر گلی گلی گھوم رہے تھے اور لوگوں سے بھیک مانگ رہے تھے۔ ہم کو اطلاع ملی کہ سب ہندو نہیں بلکہ مسلمان ہیں۔ جس کی ہم نے چھان بین کی اور آج سب پکڑے گئے۔' حالانکہ گرفتار ملزمان نے بتایا کہ وہ غربت سے پریشان تھے جس کے بعد انہوں نے اپنا بھیس بدل کر بھیک مانگنا شروع کر دیا۔
نوٹ: ای ٹی وی بھارت اس ویڈیو کی تصدیق نہیں کرتا۔
