نئی دہلی: صدر جمہوریہ ہند دروپدی مرمو اور وزیر اعظم نریندر مودی نے بدھ کو مہاویر جینتی کے موقع پر ملک کے عوام کو مبارکباد دی۔ مرمو نے ایک ٹویٹ میں کہا ’’میں ملک کے تمام لوگوں خاص طور پر جین برادری کو مہاویر جینتی کی تہہ دل سے مبارکباد پیش کرتی ہوں۔ بھگوان مہاویر نے سچائی اور عدم تشدد کا درس دے کر انسانیت کا راستہ دکھایا۔ تمام اہل وطن کو چاہیے کہ وہ عدم تشدد کی راہ پر چلیں، جانوروں کے تئیں ہمدردی رکھنے اور فطرت کی حفاظت کا عہد کریں۔ اپنے پیغام میں نائب صدر جگدیپ دھنکھرڑ نے کہا ’’بھگوان مہاویر کی تعلیمات ہمیں پاکیزگی، رحم دلی اور راست بازی کی زندگی گزارنے کی ترغیب دیتی ہیں۔ آئیے ہم خود کو بھگوان مہاویر کے آدرشوں کے لیے وقف کریں اور ہمدردی، رحم دلی اور سچائی پرر چلنے والی دنیا کی تعمیر کے لیے کام کریں۔‘‘
وزیر اعظم نریندر مودی نے بھی لوگوں کو مبارکباد دی اور ٹویٹ کیا ’’آج ایک خاص دن ہے، جب ہم بھگوان مہاویر کی عظیم تعلیمات کو یاد کرتے ہیں۔ انہوں نے ایک پرامن، ہم آہنگ اور خوشحال معاشرے کی تعمیر کا راستہ دکھایا۔ ان سے متاثر ہو کر، ہم ہمیشہ دوسروں کی خدمت کریں اور غریبوں اور پسماندہ لوگوں کی زندگیوں میں مثبت تبدیلی لائیں‘‘۔ مرکزی وزیر اطلاعات و نشریات انوراگ ٹھاکر نے بھی بھگوان مہاویر کی جنیتی پر لوگوں کو مبارکباد دی۔
یہ بھی پڑھیں: Meat Shops Closed گیا میں مہاویر جینتی کے موقع پر گوشت کی دُکانیں بند رہیں گی
انوراگ ٹھاکر نے کہا ’’بھگوان سچائی، عدم تشدد، قربانی، تپسیا اور خیرات کی راہ ہموار کرنے والے مہاویر جینتی کے موقع پر نیک خواہشات۔ ان کی زندگی ہمیں ہمیشہ دھرم کی پیروی کرنے اور ایک اچھے سماج کی تعمیر کے لیے ترغیب دیتی رہے گی۔ واضح رہے کہ مہاویر جینتی جین برادری کے سب سے اہم تہواروں میں سے ایک ہے۔ مہاویر جنم کلیانک کے نام سے مشہور اس دن موجودہ اوسرپینی کے 24ویں اور آخری تیرتھنکر بھگوان مہاویر کی پیدائش کا جشن منایا جاتا ہے۔
یو این آئی
