نئی دہلی: وزیر اعظم نریندر مودی نے کہا کہ بھارت کی ترقی کو روکنے کے لیے بھارتیہ جنتا پارٹی (بی جے پی) کو نشانہ بنایا جا رہا ہے اور بدعنوان سیاسی پارٹیاں بی جے پی کی ساکھ تباہ کرنے کی سازش کررہی ہیں۔ مودی نے کہا کہ اس سازش کا مقابلہ کرنے کے لیے بی جے پی کارکنوں کو 2047 تک اپنی لغت سے سکون کا لفظ نکال کر بدعنوانی اور اقربا پروری سے لڑنے کے لیے تیار رہنا ہوگا اور بھارت کو ایک ترقی یافتہ ملک بنانے کے لیے انتھک محنت کرنا ہوگا۔ مودی نے یہ بات یہاں دین دیال اپادھیائے مارگ پر بی جے پی کے سینٹرل آفس کمپلیکس کی توسیعی عمارتوں کے افتتاح کے موقعے پر پارٹی کارکنوں سے خطاب کرتے ہوئے کہی۔ بی جے پی کے سابق صدر ڈاکٹر مرلی منوہر جوشی، نتن گڈکری اور امت شاہ پارٹی کی توسیعی عمارت میں بنائے گئے ایک بڑے آڈیٹوریم میں منعقد اس تقریب میں موجود تھے۔ بی جے پی صدر جگت پرکاش نڈا نے وزیر اعظم کی یہاں آمد پر ان کا استقبال کیا۔
مودی نے پہلے توسیع شدہ عمارت کے احاطے کا دورہ کیا اور تعمیراتی کام میں مدد کرنے والے اہلکاروں سے ملاقات کی۔ تقریب میں پارٹی کے قومی عہدیداران، مرکزی وزراء، ارکان پارلیمنٹ اور دیگر سرکردہ لیڈران بھی بڑی تعداد میں موجود تھے۔ اس کے بعد مودی نے دفتر کے احاطے کے بھومی پوجن پروگرام میں شرکت کی۔ دفتر کے احاطے کی رسومات کل شام سے ہی شروع ہو گئی تھیں۔ گنپتی ہون، واستو ہوون، چندی ہون، نواگرہ پوجن اور ستیانارائن پوجن اور ہون وغیرہ جیسی رسومات مکمل ہوئیں۔ اپنے خطاب میں مودی نے سب سے پہلے پورے ملک کے بی جے پی کارکنوں کو مبارکباد دی اور کہا کہ جب وہ 2018 میں دفتر کا افتتاح کرنے آئے تھے تو انہوں نے کہا تھا کہ اس دفتر کی روح ہمارے کارکن ہیں۔ اس دفتر کی توسیع صرف ایک عمارت کی توسیع نہیں ہے، بلکہ یہ ہر بی جے پی کارکن کے خوابوں کی توسیع ہے۔
انہوں نے کہا کہ میں پارٹی کے کروڑوں کارکنوں کے قدموں میں اپنا سر جھکاتا ہوں۔ میں پارٹی کے تمام بانی اراکین کے سامنے بھی سر جھکاتا ہوں۔ انہوں نے کہا کہ آج سے چند روز بعد ہماری پارٹی اپنا 44واں یوم تاسیس منائے گی۔ یہ سفر ایک انتھک اور مسلسل سفر ہے، یہ سفر محنت کی انتہا کا سفر ہے، یہ سفر لگن اور عزم کی معراج کا سفر ہے، یہ سفر فکر و نظر کی وسعت کا سفر ہے۔ انہوں نے کہا کہ 1984 کے فسادات کے بعد ہوئے انتخابات میں کانگریس پارٹی کو بھاری اکثریت ملی۔ یہ جذباتی طور پر چارج شدہ ماحول تھا اور ہم اس طوفان میں تقریباً مٹ چکے تھے۔ تاہم، ہم نے کبھی امید نہیں ہاری۔ ہم نے زمین پر کام کیا اور اپنی تنظیم کو مضبوط کیا۔ ہندوستان کے طول و عرض میں بی جے پی واحد آل انڈیا سیاسی جماعت ہے۔ خاندانی چلنے والی سیاسی جماعتوں میں بی جے پی ایک ایسی سیاسی جماعت ہے جو نوجوانوں کو مواقع دیتی ہے۔ ہمیں ہندوستان کی خواتین پر ناز ہے۔
یہ بھی پڑھیں: Opposition Meeting مودی حکومت کے خلاف اٹھارہ اپوزیشن پارٹیاں متحد
مودی نے کہا کہ بی جے پی کو کئی ریاستوں میں 50 فیصد سے زیادہ ووٹ ملے ہیں۔ شمال سے جنوب تک.. مشرق سے مغرب تک، بی جے پی واحد آل انڈیا پارٹی ہے۔ انہوں نے کہا کہ آج بی جے پی نہ صرف دنیا کی سب سے بڑی پارٹی ہے بلکہ بی جے پی ہندوستان کی سب کے لئے مستقبل پر مبنی پارٹی ہے۔ ہمارا ایک ہی مقصد ہے - مستقبل کے جدید اور ترقی یافتہ ہندوستان کی تعمیر کرنا۔ انہوں نے کہا کہ شمال مشرق کے لوگوں نے بی جے پی پر بے مثال اعتماد دکھایا ہے۔ آج شمال مشرقی ریاستوں میں بی جے پی کے چار وزرائے اعلیٰ ہیں اور باقی دو ریاستوں میں ہماری مخلوط حکومت ہے۔ اس کامیابی کا سہرا بلاشبہ بی جے پی کارکنوں کو جاتا ہے۔ انہوں نے کہا کہ بی جے پی صرف الیکشن لڑنے اور جیتنے تک محدود نہیں ہے بلکہ بی جے پی ایک نظام، ایک نظریہ، ایک تنظیم اور ایک تحریک ہے۔
یو این آئی
